Kartawpah I League champion inchuhna

DSK Shivajians-in zanin dar 7:05 hian Mohun Bagan an mikhual dawn a, Ten Action-ah live in an pechhuak dawn. Pune khaw club hian an mualah Bengaluru FC an draw a, hemi hma hian champion thei tura ngaih zinga mi East Bengal chu 2-0 in an hneh tawh bawk.

Jeje Lalpekhlua a khelhna Mariners champion nawn theihna kawng hi a awlsam dawn lo, DSK Shivajians keeper Subrata Paul chuan, "Ka match zawng zawng hi ka match hnuhnung ber ang chiahin ka khel ṭhin," tiin a sawi.

DSK hi Aizawl FC hneh hnu anga enchi an ni lo a, India defender rinrawl Sandesh Jhingan an kawl a, Mizo defender pahnih Zohmingliana Ralte leh Sena Ralte tlarhnungah an ṭangkai a, Spanish midfielder Juan Quero hi a pa tet anga en chi a ni lo bawk.

Mohun Bagan tan an inkhel ang bawkin Pathianni zana Bengaluru leh East Bengal inkhel tur a pawimawh dawn. Sree Kanteerava Stadium-a inkhel tur hi Ten Action-ah a en theih ang.

East Bengal-in Mumbai FC nen 2-2 a an inhnehtawk ṭumin first half-ah captain Robert Lalthlamuana chu lakchhuah an ni a, Khawzawl defender hian inhliam avangin Bengaluru a hmachhawn thei lo ang. Amaherawhchu Red and Gold Brigade tana thu lawmawm chu Ranti Martins, Arnab Mondal, Cavin Lobo leh Bernard Mendy te an inlan thei thung ang.

Kolkata club hian Bengaluru hi khelh zat inangah point hnihin an pha lo a, point thum an hlawhchhuah theih chuan khelh zat inangah table hmahruaitu ni thei an ni. Amaherawhchu Bharasat Stadium-ah Blues-in Sunil Chhetri goal hmangin East Bengal hi 1-0 an hneh.

Inhliam vangin Sunil Chhetri chu India tan a inlan thei lo a, Mumbai FC an hneh ṭumin a khel thei lo bawk. Amaherawhchu DSK Shivajians an draw ṭumin Bengaluru skipper hi a rawn let tawh a, East Bengal an hmachhawn hunah a tawnhriat a pawimawh ang.

India captain Sunil Chhetri chuan, "DSK laka point thum kan hlawh chhuak zo lo kha pawi kan ti a, amaherawhchu kan hmabak match thum pawimawh zia kan hria. Tuna kan tihtur chu East Bengal nena kan inkhelh tur chiah ngaihtuah a ni," tiin sawi.

Pathianni tlaiah Sporting Goa leh Shillong Lajong inkhel tur a ni a, club pahnih inkhel tur erawh relegation battle a ni thung. Fatorda Stadium-ah hian point thum hmu an awm a nih chuan season tawpah an relegate tawh lo ang.

Aizawl FC-in Thawhṭanni hian RG Stadium-ah Salgaocar an hmachhawn dawn a, MPL champion hi an relegate a nih chuan Mizoram chhungah I League match awm leh tur chuan kum tam nghah a ngai tawh ang. Chuvangin football ngainatute tan chuan Goan club leh Aizawl FC inkhel hi hmaih phal chi a ni lo.