Pogba nena khelh dun chak Neymar

Tun hnaia Paris Saint Germain nena sawizawm Neymar chuan Juventus midfielder Paul Pogba nen Barcelona tana khelh dun a chak thu a sawi.

Kum 23-a upa Pogba hi season ṭan hma khan Barcelona pan tur anga sawi thawm a ri ring hle a, mahse French midfielder hian Catalan club-a cham a thlang zawk.

Brazil captain chuan, "Paul Pogba nena khelh dun hi ka chak a, Barcelona khelh dan hi awlsam taka a man theih ka ring a ni. Barcelona nuam ka tih em em na chu player kan nei ṭha hi a ni. Player ṭha ber chu Messi a ni a, Dani Alves hi football-ah chuan ka ṭhian ṭha ber a ni," a ti bawk.

Neymar chuan Pogba a ngaihsanzia sawi chhunzawmin, "Pogba nen hian kawr inthleng ka duh a ni. Ka player ngaihsan tak tak Robinho, Ronaldo leh Ronaldino-te jersey ka kawl vek a, Pogba nen hian jersey inthleng ve ka chak a ni," tiin Juventus midfielder chu a dah sang hle.

Barcelona hian zanin dar 12:00-ah Real Sociedad chu league match khel turin khualmualah an lenchilh ang.