Goal luh danin inkhelh dan sawifiah lo!

Barcelona 8-2-a sawptu Bayern Munich-in Champions League final lut turin Nilaini zan khan Lyon 3-0 in an hneh. Goal luh dan chauh thlirin Bavarians an chungnung a, Jose Alvalade Stadium-a inkhel thlirtute chuan German champion vanneihzia an hmu tel ang.

European champion zawnna hi Estadio da Luz, Lisbon-ah August 23, Pathianni zan dar 12:30-ah khelh a ni dawn a, French champion Paris St-Germain leh Bayern Munich an inkhel ang.

Bayern Munich-in quarterfinal-ah Barcelona 8-2 in an sawp a, thil thleng zen zen a ni lo. Bavarians manager Hansi Flick-a'n inkhel bul ṭantute thlak danglam turin squad nei ṭha mah se ni li chauh an awl hman avangin a rin sate rin nawn mai chu thutlukna awlsam a ni. Lyon hmachhawn tute hi Chelsea leh Barcelona nena bul ṭantute bawk kha an ni.

Lyon dinhmun a danglam lo. French club hian Manchester City 3-1 in an hneh a, quarterfinal an thlen theihna turin Juventus lamah Turin-ah goal an khung bawk. Rudi Garcia-a'n a khingpui manager ang thoin a player ngaite bawk a hmang. Juventus, Man City leh Bayern an hmachhawn ṭuma French club tana bul ṭantute chu a ngai vek an ni a, English club laka goal hnih khungtu Moussa Dembele pawh bench-ah la awm tir a ni.

Ligue 1-in ngaihsan a hlawh lo a, Barcelona hnehtu Bayern tan French league-a pasarihna Lyon harsa turin a lang lo. Amaherawhchu French club hian Juventus leh Man City te vanneih vangin an pet tla lo tih an pholang a, inkhelh ṭantirhah German club ṭantute thin phu a rang zawk.

Flick-a hoten goal an duh a, wing back tlan chak Alphonso Davies leh player fing Joshua Kimmich te hmangin mual sir aṭanga nawr an tum. Lyon manager Rudi Garcia-a'n goal venhim dan ringawt duang loin a vuak let dan turin ruahmanna a siam ṭha. French club hian rang taka Davies leh Kimmich te hmun ruak aṭanga nawr chu an tum a ni a, Bayern chak lohna ber hi tlarhnung a ni hrim hrim bawk.

Bayern midfielder Thiago-a pass fuh tawk lo chu Maxence Caqueret hian lo dang chatin kum 20 mi midfielder hi a tih tur hrilh nawn a ngai lo. French midfielder hian Bavarian defender pahnih David Alaba leh Jerome Boateng te inkar hmun awlah ball pe nghalin Memphis Depay-a'n a um lut a, Lyon captain hian keeper Manuel Neuer chauh hmachhawn mah se goal zawnah a pet thei lo.

Bavarians-in goal nawr an bansan lo a, Leon Goretzka-a'n hun ṭha a neihah a pet fuh tawk loh avangin keeper Anthony Lopes-a'n a dang hman. Lyon pawhin a vuak letna an hmu zel, Kimmich tlan chhuah vanga hmun ruak chu Man City laka goal khungtu Maxwell Cornet-a'n a hmang ṭangkai a, amaherawhchu a hmawr bawkna uluk tawk loh avangin cross ball chu Boateng-a'n a dang hman hram.

Davies awmna lam aṭang pawhin Lyon-in an nawr tho a, Cameroonian forward Toko Ekambi-a'n a harsa zawng zawng a paltlang hnuah goal ban a pet per. Bayern tlarhnung a nghing a, Lyon tlarhmate finishing ṭha se minute 20 chhungin goal thum khung thei a ni.

Lyon an inring hman lo, minute 18-naah mual dinglamah Serge Gnabry a rawn lang a, Germany international hi Lyon defender pathum venna aṭanga tal putin mual lai lamah ball a khalh a, box pawn chiah aṭangin goal pawimawh a khung. Goal khungtu hi Serge Gnabry a ni a, Arsenal duh loh tia sawi theih a ni a, Premier League manager hriat hlawh vek tak Tony Pulis-a'n, "West Brom tan a ṭha tawk lo," a tih kha a ni.

Kum 25 mi Gnabry hi England-a a hlawhchham hnuah an ramah a kir a, Werder Bremen tana season khat lek a khelh hnuah Bayern-in chan loh hlauin an la nghal. Tunah chuan Gnabry hi Bavarians player pawimawh chauh ni loin Germany innghahna a ni pha tawh a, Arsenal tel phak lohna Champions League final-ah Bayern a hruai thleng.

Goal an khung hnuah Bayern an insiamrem chho a, chutihrualin Lyon an dawihzep lo. Bavarians tlarhnung ball inpe kual tur aṭangin an veng ṭan a, German club an chungnung thei bik lo. Minute 33-naah Ivan Perisic-a cross chu Lewandowski-a'n pet fuh tawk lo mah se a per chu Gnabry-a'n a khung a, Bayern-in hahdam zawkin halftime chawlh an hman theih phah bawk. 

Bayern-in first half-a goal hnih an khung tak avangin second half-ah 'German ral lian' hmun a rinawm a, goal tam zawk hmuh inbeisei an tam ngei ang. Amaherawhchu Bayern-in defender Jerome Boateng inhliam vangin Niklas Sule an luhtir a ṭul a, Lyon lamin chak beiseina an la neih avangin Bavarians duh danin inkhel a kal thei chuang lo.

Bavarians-in Perisic hmangin goal khung belh theihna hun ṭha nei mah se Marcelo hmangin Lyon-in siphurh sut theihna an nei ve tho a, chance erawh Toki Ekambi-a'n a hlah. Sule ball clear tum chuan Depay thlaktu Moussa Dembele a per a, Houssem Aouar-a'n ball changin Toki Ekambi tan ball ṭha siam mah se Cameroonian forward ball pet hi keeper Neuer-a'n a dansak.

Lyon-in an tlarhma bil an tuar a, chutihrualin Bayern goal khung khawl Lewandowski a che fuh thei bik lo. Substitute Philippe Coutinho-a'n minute 80-naah tawih zetin Bayern goal thumna a pet lutah a inngai a, amaherawhchu offside position-a awm Goretzka-a'n a khawih zeuh avangin pawm a ni lo.

Hun tawp hnaiah erawh Lewandowski a vannei ve ta a, minute 88-naah Kimmich-a freekick pet chu Lewandowski-a'n a tauh goal a, Bayern 3-0 in an chak. Polish striker hian a khelh fuh loh zanah pawh goal a khung tho avangin Champions League match kuaah a zawnin goal a khung ta a, kum 2003-a Ruud van Nistelrooy-a record a nih rual a, kum 2018-a Cristiano Ronaldo (11) record chauh a tluk ta lo.