Bayern tlarhnung thuam ṭhat a ngai

Bayern Munich-in a vawi 11 nan Champions League final an thleng a, AC Milan record nih rualin vawi 16 final thleng thei Real Madrid chiah an tluk ta lo. Rin lawk ang ngeiin Bayern-in final lut mah se an chak dan erawh beisei ang a ni lo a, Hansi Flick pawhin insiam ṭhat a ṭul thu a sawi.

Bayern Munich boss Hansi Flick chuan, "Manchester City leh Juventus hneh zo hlim an nih avangin a harsa dawn tih kan hria. Tum dan nghet an neih avangin inkhelh ṭantirh lamah pawh kan tan harsatna an thlen nasa hle. Ṭha zawka goal venhim a ṭul dawn tih kan hre sa a, ball hloh a thiang lo tih pawh kan hria. Mahse kan tih tur leh kan tih tum te kan tih loh avangin a harsa a ni," tiin an khel ṭha tawk lo tih a pawm.

Bavarians manager Hansi Flick hi season tirah kha chuan Niko Kovac-a thachhang dawltu a ni a, Bavarians-in result an neih ṭhat loh avangin team enkawl lailawk tura tih a ni. Tunah erawh Flick hian contract puitling a ziak tawh a, Bavarians manager nih a châk ang chiahin Bayern hruaitute pawhin Bundesliga leh DFA Pokal champion puitu leh Champions League final thlenpuitu manager hi an ringtawk ta hle.