Arsenal kawng zawh lam a chiang lo

March thla ṭantirh vela Leicester City umpha thei ber tura ngaih Arsenal an zuih zel a, Pathianni zana West Ham an draw leh hram avangin tunah chuan champion theih dan kawng aiin Champions League an khelh theih loh dan kawng a zau tawh zawk.

Carroll Show

Upton Park-ah Alex Iwobi talent ṭhat zia a lang nawn a, Gunners hmahruaina goal hnih Mesut Ozil leh Alexis Sanchez te khung chu Nigerian winger siam sak ve ve a ni.

Iwobi hmingṭhatna tur chu Arsenal tlarhnungin an vaw chhe vek a, defence ṭhat tawk loh vang-in Andy Carroll-a'n first half tawp hmain goal hnih a khung a, second half ṭan aṭanga minute sarihnaah hattrick a siam zui bawk.

Tlarhnunga mahni tihtur ti lo Laurent Koscielny-a'n mual-pho hliah khuhna goal a khung a, Arsenal-in point khat an hlawh chhuak hram.

West Ham manager Slaven Bilic chuan, "Ka team-te khelh dan ka chhuang a, kan khel kha a hmuhnawm a, amaherawhchu kan result-ah ka lawm lo," tiin a sawi. Hammers goal hnih pawm sak an ni lo a, London Derby-ah hian an vanduai zawk.

Arsenal manager Arsene Wenger chuan, "Pathumna niin point 59 kan hmu a, tuna kan awmnaah hian kan lungawi lo. Champion theihna kawng a zim tawh a, theihtawp erawh kan chhuah zel ang," tiin theihtawp an chhuah chhunzawm tur thu a sawi.

Champions League

Manchester City-in Etihad Stadium-ah Stephane Sessegnon goal vangin West Brom lakah goal phur hmasa mah se Sergio Aguero leh Samir Nasri goal hmangin an lehthal.

Manchester City boss Ma-nuel Pellegrini chuan, "Season thara Champions League khelh kan duh a nih chuan mahni mualah point hloh a thiang lo. Samir Nasri leh Sergio Aguero te chawm tura Kevin de Bruyne leh Yaya Toure te neih chuan buaina chinfelin a awm ṭhin," tiin an player neih ṭhat a sawi lang.

City hian Thawhlehni zana PSG an mikhual dawn avangin De Bruyne leh Yaya te an awltir a, point hloh thei an nih hnuah luhtirin inkhel result an thlak danglam.

Relegation Battle

AFC Bournemouth-in Villa Park-ah hnehna an chang a, Aston Villa an relegate. Season tharah Villa kan hmu dawn lo a, tla tur dang pahnih a la chiang lo.

Swansea-in Gylfi Sigurd-sson goal hmangin Chelsea an hneh a, point 40 an hmuh tawh avangin an hima ngaih a ni. Blues erawh Guus Hiddink-a hnuaiah a vawi khat nan league-ah an chak lo.

Southampton-in St Mary's Stadium-ah Newcastle chu 3-1 in an sawp a, match ruk khelh hmabakah Magpies hmabak a êng lo. Newcastle boss Rafael Benitez chu Crystal Palace-in beiseina an siam sak a, Alan Pardew hoten Jason Puncheon goal hmangin Norwich an hneh a, kum 2016-a an vawi khat chakna a ni.

Palace-in him lam an hnaih a, Norwich erawh a him chinah awm mah se Newcastle United nena an inthlauhna hi point ruk chiah a ni.

Newcastle boss Rafael Benitez chuan, "A chang hi chuan kan helh hawlh nasa lutuk hi kan tan chhiatna a ni. Match ruk khelh hmabak kan nei a, match li hi kan muala khelh tur a ni. St James Park-ah chuan ṭantu kan nei ṭha a, kan vaiin kan ṭanrual a ṭul ang," tiin relegation battle boruak chu an zawh loh thu a sawi.

Magpies hian Swansea City, Manchester City, Liverpool, Crystal Palace, Aston Villa leh Tottenham Hotspurs te an la hmachhawn dawn. Newcastle hian Spanish manager Benitez hnuaia an match hmasa ber-ah Leicester City an hneh lo a, hemi zawh hian an elpui Sunderland draw lehin Norwich City leh Southampton an hneh lo zui. Kum 2000 chhoa champion rinkai zinga tel pha Newcastle hi pawisa hmang tam chung siin tla thei dinhmunah an ding mek.