Henderson-a season a tawp

Liverpool captain Jordan Henderson chu a khup hliam vangin tun season-ah a hmel kan hmu tawh dawn lo. Europa League quarterfinal-a Borussia Dortmund nen an inkhelh ṭuma inhliam midfielder hi a hliam endik a nih hnuah kar ruk aṭanga kar riat tal a chawlh a ngai dawn tih hmuhchhuah a ni.

Reds tana chanchin lawm-awm lo hi Euro 2016 khel tur England tan pawh hriat a nuam lo ang. England-in June 11-ah Euro-a an match hmasa ber an khel dawn a, kar kua lai hun la awm mah se May 12-a a squad puan chhuah tum manager Roy Hodgson-a'n player in fit lo hruai a tum loh thu a lo sawi tawh.

Kum 25-a upa Hendo hian England tan Euro qualifying match 10-ah vawi ruk lai inkhel bul a
ṭan a, March thlaa friendly match-a Germany an hneh ṭum khan inkhel bul a ṭan bawk.

Reds-in tun season-ah league match riat khelh tur an la nei a, England hi Russia, Wales leh Slova-kia-te nen group khatah an awm ho thung.