An sawi Darryl Duffy ngei chu
Kum sawm liam ta kha thlir let la, Mizoram Premier League pian hma, MFA League hun laia Lammuala ball pal khuk luih luih a nih lai khan Aizawl leilungah ngei Scottish Championship division-a top scorer hial ni tawh striker hmuh i inbeisei ngai em?
Premier League-a Swansea City i hmelhriat ṭan tirh lai kha ngaihtuah let la, Hull City in-khel pawh football ngainatu i nih chuan i en fo tawh ngei ang. Heng club lar tak tak tana lo khel tawh, striker ṭha bik inkhel lai a hmunah ngei hmuh i duh em?
Vawiin chawhnu dar 2:30-ah RG Stadium pan la, Aizawl FC leh Salgaocar inkhelh hunah i beisei ngam ngai loh leh i suangtuah ngam ngai loh striker Darryl Duffy inkhel lai chu Aizawl leilungah ngei en rawh le - hei hi theihnghilh suh, Duffy-a'n tun season-ah league match 11 khel tawhin goal 10 a khung tawh. Swansea striker hlui hian Mizoram boruak nuam a tih thu Vanglaini palai a hrilh a, zawhna awm chu Mizo defender-te'n an dang thei ang em tih hi a ni.
A tirah chuan
Kum 31-a upa striker hian India a pan hmain British club hrang hrang tan a khel nual a, British football-ah a mikhual lo hle. Naupan lai aṭanga a club
ṭan leh ngainat Rangers aṭangin a football kum a chhiar ṭan a, Scottish club lianah hian kum 19 leka upa a nihin a league match hmasa ber a khel a, Champions League-ah hial a inlan.
Mahse, Duffy-a'n British club zinga Europe-a club inelna final lut hmasa berah hian beisei angin hmun a chang tam tawk lo a. Brechin City-ah loan-a a khelh ren rawn hnuin kum 2004 khan Falkirk lam a pan - hei hi Duffy tak tak inlar ṭanna chu a ni.
Hun tawn hlimawm
Duffy-a'n a football career-a a hun tawn duhawm a sawi chu kum 2004-05 season a Falkirk tan Scottish Championship leh Scottish Challenge Cup nomawi an chawi kha a ni.
Falkirk-a a season hmasa berah hian Duffy a ropui nghal a, a match hmasa pasarih aṭangin goal kua a khung! Season a tawp meuh chuan Duffy-a'n inelna hrang hrangah match 44 khelin goal 27 a khung a, Young Player of the Year-a thlan a nih bakah top scorer a ni bawk.
Premier League an khelh hnuah Duffy-a'n Falkirk tan league match 16 khelin goal kua a khung hman a, January transfer inhawn rualin amah rimtu club tam tak zingah England lam hawiin Hull City a pan. Falkirk chairman Campbell Christie chuan Duffy chhuah ṭum hian an player chhuak chu England lamah hmasawn tura kal a duh vanga an chelh zawh loh thu a sawi.
England-ah chuan
Duffy-a'n Hull-ah beisei ang-in hmun a chang tam tawk lo a, League two club Hartlepool United leh League One club Swansea City lamah loan-in a chhuak a, Hartlepool tan vawi 10 inlanah goal nga khungin Swansea tan vawi riat inlanah goal nga a khung thung.
Welsh club-in Duffy-a'n a goal khung thiam a la theihnghilh hman lo tih hriain kum thum chhung an hnena cham turin contract an ziahpui nghal a, mah se Swansea-ah hian kum khat chiah hun a hmang hman tihin League One club tho Bristol Rovers lam a pan.
Scotland Under 21 internatio-nal hian Bristol-a a season hmasa berah goal 13 khung nghal mah se Bristol-a a hun hnuhnung lam hi club danga loan-a khelh nan a hmang a, League One club Carlisle Club leh Scottish Premier League club Hibernian-ah te loan-in a hun a hmang a ni.
Hun hnuhnung
Hibernian tana a khelh laiin Duffy-a'n a khupah hliam a tuar a, ngai a awh leh lawk thei lo. League Two lamah tla thlain Cheltenham Town a zawm a, Duffy-a'n club thar a neih meuh chuan a khup hliam a dam tawh tih khelmual chhungah a lantir.
Cheltenham Town tana a season hmasa berah goal 15 khungin top scorer a ni a, League Two play-off final a hruai thleng bawk. Mahse, a season hnihnaah mak tak maiin Duffy-a'n a beisei ang hmun a chang lo a, English club a chhuahsan.
Hello India!
Scottish Premier League club Kilmarnock training a zawm ren rawn hnuah Duffy-a'n a ngaih-dan a thlak a, kum 2013 khan Salgaocar a pan. Scottish Premier League aia I League lam Duffy-a'n a thlang hian mak tih a hlawh a, chu aia mak tih hlawh zawk erawh African leh Brazilian striker ṭha inneih siakna league-a British striker lo lang ve nawlh kha a ni.
Mahse, Goan club-a a season hmasa berah Duffy-a'n I League top scorer dinhmun Sunil Chhetri leh Cornell Glen nen luah nghalin goal 14 a khung. Hemi season hian Foreign Player of the Year a nih bakah inelna hrang hrangah match 32 khelin goal 19 a khung a, Indian football-ah tu nge Duffy? tia in zawh nawn a ngai tawh lo.