La Liga nomawi inchuh boruak nung thar

Inrinni zan khan Barcelona chu Real Sociedad lakah 1-0 in an chak lo a, Atletico Madrid leh Real Madrid ten an khingpui ve ve an hneh bawk si avangin Spanish La Liga nomawi inchuh boruak a nung thar hle. League match ruk khelh hmabak la awm aṭangin Barca hian Atletico lakah point thum chiahin hma an hruai fal ta.

Suarez tel lohna

Anoeta Stadium-ah kum 2007 hnua a vawi khat nan Barca-in chak ni hmel hmuh beisei ve mah se Champions League-a goal hnih khung hlim Luis Suarez chu hrem vangin league match-ah a hmel kan hmu thei lo a, Lionel Messi leh Neymar an la awm avangin Catalan club hian goal khung an harsat lo tura ngaih a ni.

Mahse, beisei angin thil a kal lo. Sociedad tan Mikel Oyarzabal chuan ṭan aṭanga minute ngana lekah hmahruaina goal a tauh lut a, hei bak hi Barca goal zawnah an pet tawh lo. Inkhel thunun tak chung siin Luis Enrique nauten goal an khung ve thei lo thung.

Barca thiampuipa Messi-a'n a senior career-ah goal 499 khung tawh mah se 500-na tur a khung hleithei lo a, khelmualah minute 362 chhung zet goal khung loin a awm tawh!

Barcelona coach Luis Enrique chuan, "Nomawi chawi tur a la chiang lo, hmahruaitu ni mah ila kan insiamṭhat nghal a ṭul. Kan dinhmun a la chhe lo a, engkim hi kan kuta awm a la nih avangin kan chetsual a thiang tawh lo," tiin a sawi.

Nilaini zan hian Barcelona chuan Champions League quarter-final second leg khel turin Atletico Madrid khelmual an pan ang.

Ronaldo ropui zel

Cristiano Ronaldo chu La Liga-a season ruk chhung a zawna goal 30 khung tling thei hmasa ber a ni ta! Inrinni zan khan Real Madrid hian 4-0 in Eibar an sawp.

Karim Benzema chu khup na vanga a inkhelh theih loh bakah Gareth Bale chu Wolfsburg hmachhawn turin hahchawh tir mah se Ronaldo-a'n a ṭhiante awm loh a hliahkhuh hneh hle.

Real Madird hian ṭan aṭanga minute ngana lek aṭangin goal an khung ṭana James Rodriguez chuan freekick aṭanga chhuih lutin Lucas Vazquez, Ronaldo leh Jese ten an chhunzawm a, first half-ah chak zawk tur a chiang tawh a, inkhel chawhnu lamah goal dang a lut tawh lo.

Zinedine Zidane-a naute hian point 72 hmuin nomawi an la beisei ve zel a, hmahruaitu Barcelona nen an inthlauhna chu point li chiah a ni tawh.

Real hian Champions League quarterfinal first leg-a 2-0 a an hneh loh hnu Bun-desliga club Wolfsburg chu thawhlehni zan hian Bernabeu-ah an lo mikhual ve thung ang.

Ronaldo a chawlh tir loh chhan sawiin Zidane chuan, "Inkhel tawp lam minute 15 chhung kha chu Ronaldo chawlhtir ka tum a, mahse Jese kha hliam vanga lakchhuah a ngaih tak avangin duh angin thil a kaltluang tawh lo deuh. Hei erawh hriat reng a ṭha ang, a chang hi chuan Cristiano hi chu minute 90 aia rei pawh inkhel thei turin a ṭha tawk a ni," tiin a sawi.

Atletico an tlo

Estadi Cornella-El Prat-ah Atletico Madrid-in Espanyol lakah si khat phur zet mah se 3-1 in an lehthal leh a, point 73 hmuin Barcelona chu point thum chauhin an phak lo tawh.

Espanyol tan Pape Diop chuan corner aṭanga ball lokal chu minute 28-naah a tauh lut a, Diego Simeone-a naute hian Antoine Griezmann, Fernando Torres leh Koke te hmangin an chhang let.

Atletico Madrid hian inelna hrang hrangah a zawnin match li chhung goal an chhuah ta a, tun season-a goal an chhuah zawn rei ber ṭum a ni. Khualmulah bik La Liga match-ah tun season-a corner aṭanga an goal chhuah hmasak ber a ni nghe nghe.

Argentine manger Simeone chuan, "Goal kan chhuah hnua kan beih let dan khan min ti lawm a, ka naute khelh danah ka lungawi hle. Kan thil tumah kan chiang a, chu chu a tam thei ang ber point hmuh a ni. Kan theihna zawng zawnga inkhel kan hmachhawn a nih chuan kan phutawk lawmman kan dawng ṭhin," tiin a sawi.