PSG keeper dinhmun a chiang lo

Paris St-Germain goalkeeper Kevin Trapp chu Thawhlehni zana Manchester City nen Champions League quarter-final second leg an khelh hunah a inlan theih dawn leh dawn loh a chiang lo.

Inrinni zan khan Ligue 1 champion PSG chu Guingamp khelmualah an leng lut a, Lucas Moura goah hnih hmangin 2-0 in hnehna an chang. PSG lawm a kim lo a, keeper Trapp chu minute 13-na lekah a team-mate Layvin Kurzawa nen an insut palhnaah hliam a tuar a, thlak a ngai hial. Kum 25-a upa Trapp hi half time-ah Italy international Salvatore Sirigu-a'n a rawn thlak a ni.

PSG hian March 13 khan French Ligie 1 nomawi an lo chawi daih tawh a, tunah hian anmahni hnaihtu Lyon leh Monaco aiin point 28 zetin an sang fal mek a ni.

Paris Saint-Germain head coach Laurent Blanc tan league ai chuan Champions League a pawimawh tawh zawk tih a chiang a, Guingamp an hmachhawn ṭum hian Zlatan Ibrahimovic, Angel Di Maria leh Thiago Silva te chu squad-ah pawh telh loin a hahchawlh tir vek.

A keeper chungchang sawiin Blanc chuan, "Naktukah a dinhmun kan enfiah ang a, hliam na lutuk a nih loh hram ka beisei," tiin a sawi.

PSG leh Man City te hian karhmasa khan an lo inkhel tawh a, 2-2 in an inhnehtawk tawh. Thawhlehni zan dar 12:15 hian Eihad Stadium-ah Champions League semifinal lut tur zawk an ching fel dawn a ni.