Heavyweight champion thar Joshua

British boxer Anthony Joshua chuan professional huang chhung a luhchilh aṭanga inhnek vawi 16-a hmachhawnnaah heavyweight title a hreng nghal.

Kum 26-a upa boxer hian nimin khan London khawpuia O2 Arena-ah IBF heavyweight title hlawhchhuak turin a khingpui Charles Martin chu round hnihna lekah a knockout nghal a ni.

Joshua hi Olympic champion lai ni chunga heavyweight title la thei pathumna a ni a, a hma hian Muhammad Ali leh Leon Spinks-te chu Joshua dinhmunah hian an lo ding tawh.

Vawi 16 inhnek a hmachhawna a khingpuite la knockout vektu Joshua hian heavyweight kawnghren hreng tura match mamawh tlem lamah match riat a hmachhawna champion kawnghren hreng thei Spinks chiah a tluk tawh lo. British boxer duhawm hian Ali (20), Lennox Lewis (22) leh Mike Tyson (28)-te a khum vek a ni.

Fury nen?

Nikum November thlaa Tyson Fury-a'n Ukrainian boxer rothap Wladimir Klitschko a hneh hnuah July 9 khian Manchester khawpuiah an inhnek nawn leh tur thu puan a ni a, WBA leh WBO title kawltu Fury hian hnena a chang leh a nih ngat chuan Joshua leh Fury hi an inhmachhawn rin a ni.