Bayern-in nomawi an hnaih ta

Bundesliga title a zawna a vawi li nana chawi turin Bayern Munich dinhmun a ṭha leh tawh. Inrinni zan khan Pep Guardiola naute hian khualmualah VfB Stuttgart chu 3-1 in an sawp a, nizana inkhel Borussia Dortmund result kan hriat hman loh avangin he thu ziah laia an hmahruaina chu point riat lai a ni.

Mercedes-Benz-Arena-ah hliam vanga hun rei tak a chawlh hnua tun hnaia lo kir Franck Ribery cross chu Georg Niedermeier-a'n anmahni lamah a ti lut palh a, second half-ah David Alaba chuan Bayern goal hnihna khung lehin Stuttgart tan Daniel Didavi chuan goal khat khung ve mah se Douglas Costa chuan Bayern chak nemngheh nan hla tak aṭangin goal ropui a khung.

Bayern hian league match nga chiah khelh hmabak an nei tawh
aṭangin champion turin a tam berah point 11 bak an mamawh tawh lo a ni.

Season thara Man-chester City manager ni tawh tur Guardiola chuan Nilaini a Benfica nen Champions League quarterfinal second leg an khelh tur hre ranin Thomas Muller, Philipp Lahm, Costa leh Thiago te chu bench-ah hahchawlh tir mah se Stuggart lakah harsatna lian tham an tawk lo.

Guardiola thukhawchang

Spanish manager Guardiola chuan, "League champion ni tur chuan a tlem berah vawi thum chak bakah draw kan la mamawh a, nomawi hi kan banphaka awm ni tawh mah se awlsam taka lak theih erawh a la ni lo. Kan khingpui ten freekick leh corner an hmuin kan talbuai ṭhin hle a, kan insiam ṭhat zel a ngai. Stuttgart lakah khan first half kan khelṭha tawk lo a, hun chanve hnulamah erawh inkhel kan thunun thei," tiin a sawi.

Inkhel dangah Aug-sburg chuan Finnbogason leh Hong Jeong-ho te goal khung hmangin Werder Bremen 2-1 in an hneh a, relegation zone an chhuah san. Hetihlai hian chak lo zawk Werder Bremen erawh relegation play-off khel tur dinhmunah an ding rih.

Hoffenheim-in an boruak ṭha an chhawm nung zel a, tun hnaian Bundesliga match li
aṭangin vawi thum hnehna an chang ta. Inrinni zan vek khan table mawng ber dawta awm mek Eintracht Frankfurt chu 2-0 in an hneh.