Juve chak nan Pogba goal a tawk
San Siro-ah Juventus-in si an phurh zet hnuah AC Milan chu 2-1 in an lehthal leh a, Italian Serie A champion nomawi chawi turin an dinhmun a ṭha thawkhat tawh. Chak lo zawk Milan tan erawh a sang pathum zinga tel beisei ngam chi a ni tawh lo thung.
Inrinni zan Italian Serie A inkhelah mualneitu Milan tan Mario Balotelli corner pet chu minute 18-na lekah Alex-a'n a tauh goal nghal a, Sinisa Mihajlovic nauten beiseina an nei sang hman hle.
Mahse, Milan an lawm rei lo. Minute 27-naah Juve tan Mario Mandzukic chuan an si phurh a sut a, Liverpool striker hlui Balotelli-a'n goal khung ve leh mah se handball vangin pawm a ni lo a, Paul Pogba chuan free-kick aṭangin goal ban a pet per dawp bawk.
Minute 65-naah tunlaia midfielder hmuhnawm ber pawl Pogba a rawn inlar a, France internatinal hian Claudio Marchisio corner pet chu a awma lo dawngin goal-ah a thlawh lut zui a ni. Tun hnai a match hnuhnung palia a goal thumna a ni nghe nghe.
Milan hi an chak loh avangin league table-ah parukna dinhmun an luah a ngai a, Juve erawhin point 76 hmuin Napoli aiin point kuain an sang fal rih a, mahse nizana Napoli inkhel result a zirin an inthlauhna hi a la danglam leh thei ang.
Juventus hian tun hnaiah an khelṭha tluang takzet a, point 66 hlawhchhuah theihna aṭangin point 64 ngawt an hmu thei a, a zawna a vawi nga nana league title la turin kawng thui zawh a ngai tawh lo.
Buffon an fak
Milan goal khung tur vawi kua ngawt dangtu keeper Gianluigi Buffon fakin Pogba chuan, "Ani hi chu chuh buaitu awm loin khawvela ṭha ber a ni. Sawi leh chuan tur a awm lo a, a thiamna leh theihna hi a sang fal hle," tiin Italian keeper a dah sang hle.
Pogba thusawi thlawpin Juve manager Massimiliano Allegri pawhin, "Milan khan chak zawk nih phu khawpin an khel a, mahse kan goal veng kha Buffon a nih avangin an tan paltlang a harsa a ni," tiin a sawi bawk.
Inrinni zan Serie A inkhel dang-ah Mauro Icardi goal khat khung hmangin Inter Milan chuan Frosinone 1-0 in an hneh a, point 58 hmuin palina dinhmunah an inhlangkai.
Carpi chu Chievo lakah 1-0 a an chak loh avangin relegation zone
aṭangin goal difference hmang chauhin an him tawh. Genoa chuan 1-0 in Sassuolo lakah hnehna an chang ve bawk.