Mizoramin I League club a nei zel dawn em? Aizawl FC Vs Salgaocar FC
Vawiin hi tun season-a Mizoram chhunga I League inkhel hnuhnung ber tur a ni a, Aizawl FC an relegate erawh chuan Mizoram chhunga I League inkhel hnuhnung ber a nih theih avangin football ngaina leh ngaina lo tan pawh inkhel hi en ngei chi a ni.
Tlai dar 2:30 hian Rajiv Gandhi Stadium, Mualpuiah Aizawl FC leh Salgaocar FC te an inkhel dawn a, result hian season thar I League khel thei tur a nghawng phak avangin MPL champion leh Goan club ṭha inkhel tur hi final tluk zeta pawimawh a ni.
Hmalam hriltu
Aizawl FC, Mumbai FC leh Salgaocar ten point 13 vek an hmu a, table mawng-phaha awm Santosh Kashyap hoten hian match thum khelh hmabak an la neih avangin an dinhmun a ṭha letling. Nimin tlaia inkhel Sporting Clube de Goa leh Shillong Lajong te chu chhiarkawp danin an la him bik lo a, amaherawhchu Aizawl FC tan club dang result-a innghah ngam chi a ni tawh lo.
Aizawl FC hian an tlukpui Salgaocar an hmachhawn dawn avangin vawiin tlai inkhel tur hi point thum inchuhna ni loin point ruk inchuhnaah a ngaih theih.
Fatorda Stadium-ah club pahnih hi 1-1 in an inhnehtawk a, RG Stadium-a chak zawk hi head to head-ah an ṭhat zawk dawn avangin an vawi hnih inkhelhna result hian club pahnih hmalam hun a hril ang.
MPL champion hian vawiin bakah hian Pune-ah DSK Shivajians an la hmachhawn dawn a, Salgaocar erawhin Bengaluru FC leh Sporting Goa te an la khelhpui dawn.
Round 16-ah Mumbai FC an awl a, Khalid Jamil hoten hian Cooperage Ground-ah Shillong Lajong leh DSK Shivajians an la mikhual ang. Aizawl FC hi round hnuhnung ber Round 18 an awl dawn avangin inkhel dang result-a innghah an duh lo a nih chuan an hmabak match hnihah an himna tur tawk point an hmuh a ṭul ang.
Inrintawkna
Nikum season-a Royal Wahingdoh pathumna nihpuitu coach Santosh Kashyap a inringtawk hle. Air India FC, Mohun Bagan, ONGC leh Rangdajied United lo enkawl tawhtu coach hian Salgaocar a zawm hmain Goan club hi Malky Thomson hnuaiah match liah an chak lo vek a, tunah erawh match kuah point 13 hmuin I League khelh chhunzawm zel an inbeisei.
AFC Pro Licence nei Santosh Kashyap chuan, "100%-in kan relegate lo ang tih ka ring, eng coach mahin an club enkawl hi relegate turin an ring lo ang. Kan game khelh apiang hi final ang vekin kan thlir a, Aizawl FC lakah hian point hlawhchhuah ngei kan tum," tiin Vanglaini palai a hrih.
Salgaocar hian inhliam vangin Khasi player ṭha Rocus Lamare rawn hruai thei lo mah se an foreign player-te an dam kim. Tlarhmaah Swansea striker hlui Darryl Duffy leh Cameroonian striker Calvin Mbarga te an nei a, midfield laia awm turin Scottish midfielder Martin Scott a awm tawh a, tlarhnungah Brazilian defender Eder a awm bawk.
Goan club hian India keeper ṭha Karanjit Singh an kawl a, Salgaocar captain hi tun season match zawng zawngah a la inlan vek. I League best player ni lai Jackichand Singh chu goal khung tura nawrna lamah player paiwmawh a ni dawn a, Shillong Lajong lama chakna goal khungtu Gilbert Olivera leh East Bengal an sawp ṭuma goal hnih khungtu Thongkhosiem Haokip te hming sawi hmaih a rem lo bawk.
Captain tel loin
Aizawl FC-in captain David Lalrin-muana chu hrem vangin an chhawr thei dawn lo a, winger Brandon VL Remdika chu damlohna vangin squad-ah a tel theih hmel lo bawk. Zemabawk North midfielder David-a hi player ṭha tak ni mah se tun season-ah starting eleven chan phak loh
ṭum a nei fo a, chuvangin MPL champion tan a thlakna neih a har lo ang. Brandon aiawh tur hian Shillong Lajong lama goal khungtu H. Lalmuankima a awm thei a, MPL4 best player F. Lalrinpuia a inlan thei bawk.
Aizawl FC coach Jahar Das chuan, "David-a tel lo tur hi kan tan chuan chan-chin ṭha lo a ni. Salgaocar nena kan inkhel tur hi a pawimawh a, kan captain tel loh vangin chhuanlam kan siam tur a ni lo. Point thum hmuh tumin kan khel ang a, tlarhnung erawh kan ven thiam a pawimawh ang. Shillong Lajong lakah kan tisual a, Sporting Goa kan khelh ṭum chuan goal venhim kan thiam tih kan lantir tawh," tiin tlarhnung lama hmasawnna a awm thu a sawi.
MPL champion hian match nga chhung chu a zawnin goal an khung tawh a, anmahni ṭantute hmaah chuan Joel Sunday, Alfred Kemah Jaryan leh Albert Zohmingmawia te dan an harsa lehzual ang.
Aizawl FC manager K. Malsawmkima chuan, "Theihtawp chhuahin kan inbuat-saih a, kan inzir angin Salgaocar hi kan hmachhawn tawp ang. Pressure kan nei hranpa lo a, Goan club lakah hian kan theihna zawng zawng kan chhuah ang," tiin Vanglaini palai a hrilh.
Player 12-na
I League zawh hian relegate team tel loin Federation Cup khelh a ni dawn. India ram chhung club football tana knockout football hlu ber hi home leh away a khelh tur a nih avangin Aizawl FC hi an relegate a nih chuan Mizo mipuiten Federation Cup an chan ang.
I League khelh chhunzawm zel nan leh Federation Cup kan en theih nan Salgaocar leh Aizawl FC inkhel tur hi Mizo mipuiin an lak thutak a ṭul. MPL champion hi an theih ang tawk a ṭhain an inpuahchah a, player 12-na mipui lamin an puih leh bawk chuan Goan club tan khelh a harsa sawt ang.
Football ngainatute tan vawiin inkhel hi hmaih a thiang lo a, Aizawl FC hian ṭawiawmna ṭha an hmu a nih chuan Mizoram chhungah India rama footballer ṭhate an lo kal chhunzawm zel dawn. Chutihrualin supporter-te an fimkhur tel erawh a ṭul, Aizawl FC-in hremna chi hnih an tawk tawh a, mipui lam an che mawi lo nawn leh a nih chuan Mizo club-in hremna na zawk an hmachhawn ang.
Tun Season Chhung Thlirna Tawi
Malky Thomson - 0 Pt
Salgaocar 1 - 2 Bengaluru
Mohun Bagan 4 - 2 Salgaocar
Mumbai 2 - 1 Salgaocar
Shillong Lajong 1 - 0 Salgaocar
Santosh Kashyap - 13 Pts
Salgaocar 1 - 1 Aizawl FC
Sporting Goa 1 - 1 Salgaocar
DSK Shivajians 2 - 3 Salgaocar
East Bengal 2 - 1 Salgaocar
Salgaocar 1 - 3 Mohun Bagan
Salgaocar 3 - 1 East Bengal
Salgaocar 2 - 2 Mumbai
Salgaocar 1 - 0 Shillong Lajong
Salgaocar 1 - 1 DSK Shivajians
Vawiin Inkhel Tur
Aizawl FC 2:30 PM Salgaocar
April 17, Pathianni
Bengaluru 7:05 PM Salgaocar
April 24, Pathianni
Salgaocar 7:05 PM Sporting Goa
Manuel Retamero - 4 Pts
Mohun Bagan 3 - 1 Aizawl FC
Aizawl FC 0 - 1 Bengaluru
Aizawl FC 2 - 0 DSK Shivajians
Aizawl FC 0 - 2 Sporting Goa
Salgaocar 1 - 1 Aizawl FC
East Bengal 2 - 0 Aizawl FC
Jahar Das - 9 Pts
Aizawl FC 0 - 0 Shillong Lajong
Aizawl FC 2 - 0 Mumbai
Bengaluru 1 - 0 Aizawl FC
Mumbai FC 2 - 2 Aizawl FC
Aizawl FC 2 - 3 East Bengal
Aizawl FC 2 - 1 Mohun Bagan
Shillong Lajong 3 - 1 Aizawl FC
Sporting Goa 1 - 1 Aizawl FC
Vawiin Inkhel Tur
Aizawl FC 2:30 PM Salgaocar
April 16, Inrinni
DSK Shivajians 7:05 PM Aizawl FC