Bradley hnehin Pacman a chawl ta

Boxing ring chhungah Manny Pacquiao hmel kan hmu tawh dawn lo. Nimin khan Filipino boxer hian Timothy Bradley chu unanimous decision-a hnehin boxing khawvela inhnek a hmachhawn hnuhnung ber a ni ta.

Las Vegas khawpuia MGM Grand Arena-a inhnekah hian Pacquiao-a'n round 7-na leh 9-naah a khingpui Bradley hi a hnek thlu a, judge pathumten Filipino boxer hi 116-110 in chak zawkah an puang vek.

Kum 37-a upa Pac-quiao leh Bradley hi an vawi thum intawnna a ni a, kum 2012 khan sawisel hlawh tak chung-in Bradley-a'n hnehna a chang. Kum hnih hnuah boxer pahnih hi inhmachhawn lehin Pacquiao-a'n hnehna changin a vawi thumnaah pawh Filipino boxer bawk a chungnung leh ta a ni.

Pacquiao thukhawchang

Division hrang pariata boxing champion ni thei hmasa ber leh awmchhun Pacquiao chuan, "Ka chhungte hnenah ka chawlh tur thu ka lo tiam tawh a ni," tiin boxing-ah a hmel lan a tum tawh loh thu a sawi.

Pacman chuan sawi chhunzawmin, "Hlim leh lungawi taka chawlin kan ram mipuite tan hnathawh ka duh a, min mamawhna hi chhanlet a hun tawh a ni," tiin an ram Phillippines lama a political career-ah a in-sawr bing tur thu a sawi bawk.

Bradley chuan a khingpui boxer fakin,"A che rang em em a, a hnek na bawk si a, a buaithlak a ni," a ti. Pacquiao-a'n vawi 439 a hnek chhuahah vawi 122 lai Bradley a hnek fuh thei a, Bradley-a'n vawi 302 a kut a vai chhuahah vawi 99 chiah a hnek fuh thung.

Boxing khawvela kum 21 hun a hman chhungin Pacquiao hi boxer en hlawh ber pawl a ni a, a inhnek hmachhawn tawh zawng zawnga pay per view aṭanga sum lut ringawt hi pound mak-taduai 850 vel a ni.

May, 2015-a boxing khawvela inhnek ngaihven hlawh ber ang hiala an sawia Floyd Mayweather hneh lotu Pacquiao hian boxing-a hun a hman chhungin vawi 66 inhnek hmachhawnin vawi 58 a chak a, vawi 38 a khing-puite knockout in vawi ruk a tlawm a, vawi hnih a inhnehtawkpui thung.