Match li chhung chak hmel hmu lo Bagan

Aizawl FC an hneh loh hnuah I League champion Mo-hun Bagan-in Kolkata Derby-ah East Bengal an hneh lo a, Shillong Lajong leh DSK Shivajians an draw leh bawk. Mariners hian champion no-mawi hi Bengaluru leh East Bengal ban phakah an chhawp.

Inrinni zan khan Barasat Stadium-ah mualneituin bul an ṭan ṭha a, Jeje Lalpekhlua ball pet chu DSK keeper Subrata Paul-a'n dang nghet zo loin Cornell Glen-a'n awlsam takin a khung. Amaherawhchu Real Madrid youth system chhuak Juan Quero Barraso-a'n cool takin goal hnih a khung a, minute 34 a nih chuan DSK chu hmahruaitu an ni.

First half tawp hmain player ṭha bik danglamna a lang a, Glen leh Sony Norde-a'n anmahni thawhrah sengin an pet goal. DSK tlarhnunga ding Sandesh Jhingan leh Zohmingliana Ralte ten an tihtur an ti lo.

Darkar khat hnuah Sony Norde chu inhliam vangin lakchhuah a ni a, Dhanachandra Singh-a'n crossbar pet per bawkin Bagan an vanduai. Shillong Lajong an hmachhawn ang thoin Mariners tlarhnung a pawp a, Quero pass chu Israil Gurung-a'n ṭha taka vawrh lutin changtu nei lo Aser Dipanda Dica-a'n chiang takin a tauh lut.

Bagan-in goal dang khung ngei tumin nawr let tum mah se Norde a awm tawh loh avangin an goal bawh a na tawk lo a, 3-3 in team pahnih inkhel an ṭin. Mariners hian match khat chiah khelh tur an nei tawh a, match hnuhnung berah Bengaluru FC an hmachhawn ang. Relegate thei lo DSK Shivajians erawhin tla thei dinhmuna ding Aizawl FC leh Mumbai FC te an khelhpui thung ang.