Premier League ṭanna champion vs champion

Nimin khan 2020/21 Premier League season fixtures chu tihchhuah a ni ta a, gameweek hmasa berah Premier League champion Liverpool leh Championship champion Leeds United an inhmachhawn dawn.

Premier League hi September 12, Inrinni aṭanga khelh ṭan turin ruahmanna an siam a, inkhelh ni tur puanzar a la nih loh avangin inkhelh ṭan hun dah tel a la ni lo. Gameweek hmasa ber hi September 12-14, 2020-ah khelh tur a ni a, Manchester City vs Aston Villa leh Burnley vs Manchester United te inkhelh hun erawh sawn hlat a ni.

Manchester khaw club pahnih hi Champions League leh Europa League-ah an khelh rei avangin an inkhelh hun hi an sawn tlaisak dawn. Chelsea leh Wolverhampton Wanderers te pawh Europe inelnaa an hmachhawn avangin season ṭanna inkhel hi September 14, Thawhṭanniah an khel ang. Blues hian Brighton and Hove Albion an hmachhawn ang a, Wolves leh Sheffield United an inkhel ang.

Premier League ṭanna ngaihven hlawh ber tur chu Liverpool leh Leeds inkhel tur hi a ni ang. Argentine manager Marcelo Bielsa hoin Leeds United-in kum 16 hnuah Premier League an khel leh dawn.

Liverpool erawh kum 30 hnuah a vawi khat nan English champion an ni thung. An inkhelhna hmun tur hi Anfield a ni a, Reds hi an muala Premier League match an khelh hnuhnung 26-ah vawi 25 an chak. An chak loh awmchhun hi April 2017-a Crystal Palace 3-1 a an hneh loh ṭum kha a ni.