Highlanders ngam loh Chennaiyin

Ningani zan Indian Super League inkhelah Chennaiyin chuan an mikhual NorthEast United chu 2-0 in an hneh a, mualneitu team tana Rafael Crivellaro leh Nerijus Valskis goal khung chu Highlanders lamin a chhanletna tur an nei thei lo. 

NorthEast United tan striker thar Andrew Keogh chuan inkhel bul a ṭan nghal a, Republic of Ireland tana vawi 30 inlan thei striker hian hun duhawm pawh nei nghal mah se goal-ah a chantir thei lo a, Highlanders tana ṭangkai turin awm tlangnel phawt a la mamawh rih tih a lang. 

Chennaiyin hian an match hnuhnung pahnihah hnehna an chang ta a, South Indian club hi John Gregory bana Owen Coyle an lakluh hnuah hma an sawn tih a lang. NorthEast United erawh semifinal khelh phak an la tum ve a nih chuan tui taka mut rengna chi a ni tawh lo. November 6-a Hyderabad an hneh hnuah khan Guwahati club hian hnehna an chang leh tawh lo a, hetih chhung hian match sarih an khel!

Match sarihah hian vawi thum an khingpui an inhnehtawkpui a, vawi li a tlawm zawkah an ṭang - Chennaiyin laka an tlawmna inkhelah hian Lalengmawia chuan inkhel bul a ṭan. Chennaiyin tan Laldinliana Renthlei, Jerry Lalrinzuala leh Lallianzuala Chhangte ten bul an ṭan a, khel ṭha em em mai Lianzuala hi ‘Winning Pass of the Match’ chawimawina pek a ni. 

Zanin Inkhel Tur

ATK    7:30 PM    FC Goa

January 19, Pathianni Zan

Jamshedpur    7:30 PM    Kerala Blasters