Leicester City ûm ngam Tottenham

Chhiarkawp dan ang thlapin Premier League-ah Manchester United an champion thei tawh lo a, Manchester City-in cham-pion an beisei ngam tawh lo a, Arsenal manager Arsene Wenger-a'n supporter-te rilru hnual loh nan chauh nomawi a thlir tawh niin a lang bawk. Tun dinhmunah a zawna vawi nga chak zawn Leicester City chu champion tura rinkai lawr lak ni tawh mah se Tottenham Hotspurs an fei ve tlat avangin match nga khelh hmabak la awmah result danglam a la thleng ve thei tlat.

Tlak hlau Sunderland-in Jamie Vardy an chelh lo a, kum nga liam taa non-league club FC Halifax Town tana khel striker hian Stadium of Light-ah goal hnih khungin Leicester City chu dinhmun ṭha zawkah a dah. Amaherawhchu point 10 laia Foxes chungnunna hi Tottenham-in an ti zim nghal a, traffic jam in ti rei hret mah se White Hart Lane-a Manchester United an sawp avangin Spurs-in Claudio Ranieri hote point sarihin an phak lo a, season tawp chanchin a ngaihnawm chhunzawm zel.

Tlawm ve lo 'Vardy'

Beiseina leh hlauhthawnna an intawng a, hun tawp meuh chuan beiseina nena minute 90 chhung tlan thei Jamie Vardy chu Leicester City chakna a ni. English striker hian minute 66-naah Danny Drinkwater ball vawrh luh chu chak taka um lutin goal khung turin vawi hnih khawih bak a mamawh lo a, Black Cats keeper position dik tawk lo Vito Mannone a hrem nalh hle. Kum 29-a upa Vardy hian injury time-ah tharum hmanga Dutch defender Patrick van Aanholt tlan pelin keeper Mannone a bum leh a, chiang zetin chak nemnghehna goal a khung.

Match li a zawna 1-0 a chak tawh Foxes tan 2-0 a chak hi result awm tak niin lang mah se tla thei dinhmuna ding Sunderland in awlsam takin an chaktir lo. Sam Allardyce chuan defence pui turin feet ruk leh inches ngaa sang Jan Kirchhoff a dah lut a, German defensive midfielder leh Lee Cattermole te inkawp hian Foxes playmaker Riyad Mahrez an dah ṭha a, French midfielder N’Golo Kante pawhin ṭum dang ang lo takin a position a hloh fo bawk.

Foxes-in goal khat hmanga point thum hlawhchhuah leh goal tam zawk hmanga point thum hmuh a inang reng tih an hrechiang a, dawhthei takin Black Cats nawr let hun an chang a, minute 66-naah an tum a hlawhtling. Sunderland si phurh sutna hun ṭha neih chu substitute Jack Rodwell-a'n a hlah a, chutihrualin goal khat luh hnuah Foxes-in goal chance an ngah avangin chak an phu hrim hrim. Hun pek belhah Vardy-a'n tun season Premier League-a a goal 21-na a khung a, Leicester City player zingah 1984-85 season-a Gary Lineker-a'n goal 24 a khung hnua top flight football-a goal 20 khung leh thei hmasa ber a ni.

Mumang ram

Hun a tawp chiah chuan Clau-dio Ranieri a insum thei bik lo a, Italian manager hi lawm vanga mittui thoin a la hmuak thei a, lungngaihna mittui a la awm thei bawk, eng zawk pawh thleng nawn se patling mittui far hi dem theih a ni lo.

Leicester boss Ranieri chuan, "Supporter lam chu mu--mang ramah an cheng chhun-zawm thei a, keini erawhin kan inkhelh leh tur chauh kan ngaihtuah a ṭul. Kan mualah match hnih harsa takin min hmuak a, kan tum ram kan la thleng lo," tiin thil danga rilru pek a la hun loh thu a sawi.

Result dik lo

Sunderland manager Sam Allardyce chuan, "Goal khatna kan chhuah dan kha ka hrethiam lo, Vardy kha a ṭhat theih dan bera khelh theihna hun kan pe a ni. Vardy-a'n goal a khung a, keini lamin goal khungtu tur kan nei lo. Goal khat kan chhuah hnuah kan talbuai a, khami hma zawng kha chuan team ṭha zawk kan ni. Point hmuh theihna tura kan hmu lo hi a pawi a ni, Leicester ṭhat vang a ni lo a, kan thiam loh a ni," tiin an vanduai thu a sawi.

Black Cats hian match khata khel tlemin Norwich City point liin an pha lo a, April 16 hian an chung chiaha awm Canaries hi an hmachhawn dawn. Leicester hmabak a awlsam bik dawn lo, Arsenal chelhtu West Ham an mikhual dawn.