An ramah Lee a vul

Lee Chong Wei chuan an ramah badminton thiam bik a nih zia a lan tir leh ta. Pathianni khan Chen Long hnehin a vawi 11 nan Malaysian Open title a chawi.

World number 4 Lee hian Chinese shuttler Chen Long lakah hian hnehna chang turin minute 42 chhung a mamawh a, straight game 21-13, 21-8 in a chak a ni.

Malaysian shuttler Lee hian All England Championships leh India Open-ah te beisei angin khel chhuak lo mah se an ramah a chetṭhat leh tak avang hian August thla a neih tur Rio Olympic atan beiseina a nei sang ve leh tawh hle.

Kum 33-a upa Lee chuan, "Mi tam takin ka kum a tamtawh vang leh tun hnaiah ka khelh ṭhat tawk loh avangin inkhelh chawlhsan tawh mai turin min ti a, mahse ka rilruah chawlh ai chuan hmalam pan ka la duh avangin theihtawpin ka bei let a, ka hlawhltling ta a ni. Tunah chuan Olympic pawh beiseina nen ka thlir thei ang," tiin a sawi.

Nikum Malaysian Open-ah khan Lee hi hrem vangin a inlan ve lo a, hei hi kum 2014 world championship-a damdawi hman phal loh a hman vang a ni. Mahse, nikum April khan Badminton World Federation chuan world number 1 pawh lo ni reng tawh Lee hian a tihpalh thila damdawi hi lo ei palh a ni tih hre chhuakin thla riat an hrem hnuah a inkhelh an phal sak ve leh ta a ni.