Van Gaal-a'n a risk fuh lo
Traffic jam-ah Manchester United team bus a tan avangin inkhelh hun tih khawtlai a ni a, Premier League a thil thleng zen zen lo a ni. White Hart Lane-ah erawh tun season-a thleng zing tak hmuh tur a awm a, inelna hrang hranga a vawi 14 nan United an chak lo.
Red Devils-in point an hlawhchhuah zawh loh avangin chhiarkawp danin Leicester City-in season tharah Champions League an khel chiang tawh a, Louis van Gaal-a hote erawh kum thum chhunga a vawi hnih nan Europe-a inelna sang ber an khelpha leh dawn lo niin a lang.
Goal thum
Pathianni zan hian Tottenham Hotspurs-in inkhel an thunun zawk a, mikhual team United tan Anthony Martial-a'n Spurs defender tlan pel dual mah se a ball pet chu league-a goal chhuah tlem ber Spurs keeper Hugo LLoris-a'n (keeper ṭha ber?) a dan sak. Tottenham tan Dele Alli-a'n minute 70-naah goal hmahruai a khung a, minute ruk a ral chuan Toby Alderweireld leh Erik Lamela te'n goal khat ve ve khung belhin 3-0 in hma an hruai a, United goalkeeper David de Gea a chet ṭhat avangin Harry Kane leh Spurs in goal an khung tawh lo.
Van Gaal Philosophy
Man United boss Van Gaal-a'n second half-ah a ze ngai a chhuah a, Dutch manager hian Bayern Munich a enkawl laiin Bastian Schweinsteiger chu winger aṭangin midfield laiah a sawn lut tawh a, player ṭhahnem tak an khelhna pangngai lo deuhah a lo chhawr tawh bawk. Spurs an tum ṭumin second half-ah Marcus Rashford la chhuakin Ashley Young a luhtir a, English winger hi tlarhmaah mal tlatin Spurs defending leh attacking a ti ṭha sawt. United vanduaina belhchhah turin defender zinga khel ṭha ber Timothy Fosu-Mensah chu inhliam vangin thlak a ngai a, Spurs goal thum hi Dutch defender thlaktu Italian right back Matteo Darmian awmna lam aṭanga lut a ni.
Manchester United manager Louis van Gaal chuan, "Inkhelh hmain Spurs ṭhat thu ka sawi tawh a, amaherawhchu goal khat an khung hma kha chuan team ṭha tak kan ni. 3-0 hi result ṭha lo a ni a, amaherawhchu first half-a kan khelh danah erawh a ṭha a ni," tiin a naute ṭhatna lai a sawi lang hram.
United hian Nilaini zan dar 11:30-ah West Ham nen Upton Park-ah FA Cup quarterfinal replay an khel ang a, an chak a nih chuan April 23-ah Everton nen semifinal an khel ang. Semifinal pakhat zawkah Crystal Palace leh Watford an inkhelh dawn avangin season hmang ṭha lo Red Devils tan nomawi chawi theihna kawng a la inhawng.
Hei le Spurs chu
Tottenham Hotspurs-in league-ah goal an chhuah tlem ber bakah goal khung tam ber an ni. Premier League season khat chhungin goal khung tam leh chhuah tlem record nei chungin Manchester United (2001 & 2008), Arsenal (2004) Chelsea (2006) leh Manchester City (2012) an champion tawh a, hetiang record neia champion lo awm chhun chu Manchester United niin kum 1998 khan pahnihna an ni.
Tottenham boss Mauricio Pochettino chuan, "Kan rilru put hmang chu kan lantirin kan hria, dawhtheihna nen champion kan la beisei ve zel a ni. Leicester hi la chesual ve thei tho an nih avangin kan inpeih ve reng a ṭul. Point sarih hi in umphak tur em chuan a tam mah mah a, amaherawhchu beiseina kan neih a ngai. Manchester United kan khelh dan te, kan result neih dan te en khan beiseina chu kan nei a ni," tiin champion tuma Leicester um zel an tum thu a sawi.