Sawmtea GOAL - Bengaluru chungnunna

Mizo rawlthar Malsawmzuala goal khung zanah Bengaluru-in 3-1 in an elpui East Bengal an hneh a, inkhel hmabak pahnih an la neihah I League nomawi chawi turin point hnih chiah an mamawh ta.

Bengaluru tan Chaltlang midfielder Sawm-tea bakah Eugeneson Lyngdoh leh Kim Seong Yong-te'n goal khat ve ve an khung bawk a, Dong-Hyun Do hmanga goal hmahruai khungtu East Bengal-in goal dang an khung thei lo - point thum an chân mai ni loin I League nomawi an thlauh telah ngaih theih a ni.

Tute nge khel?

East Bengal an mikhual hmaa DSK Shivajians nena inhnehtawk Bengaluru coach Ashley Westwood-a'n a team a siksawi nual a, Mizo tlangval pahnihin inkhel bul an ṭan.

Lalchhuanmawia Fanai chuan inkhel bul a ṭan a, Thoi Singh aiah Malsawmzuala chu khelmual chhungah tlan luhtir niin DSK Shivajians laka inkhel bul ṭan CK Vineeth leh Daniel Lalhlimpuia-te erawh bench luahlum tir an ni.

Kolkata club tan hrem vanga inlan thei lo Arnab Mondal leh inhliam captain Robert Lalthlamuana-te aiah Sehnaj Singh leh Saumik Dey te khelmualah an inlan a, S. Malsawmtluanga'n inkhel bul ṭan lo mah se second half-ah a lut thung.

Inngam tawk

Sree Kanteerava Stadium, Bangalore-a inkhelah team pahnih an inhlau lo tawn a, inkhel thununtu erawh mualneitu Bengaluru FC niin Sunil Chhetri, Kim Song Yong leh Eugeneson Lyngdoh-te'n hma taka an hun ṭha neih an chhawr ṭangkai thei lo thung.

Bengaluru midfielder Sawmtea a chesual a, Mizo rawlthar duhawm hian field laia a ball lak sual chu South Korean striker Dong-Hyun Do a ber kherin a lak sak. Kum 22-a upa Do hiann a pet goal.

East Bengal hlim chhung erawh a rei lo. Minute khat a liam chauh tihin Bengaluru-in Eugeneson hmangin an si phurh an sut.

Sawm lohin Sawmtea

Second half-ah Bengaluru-in inkhel an thunun chhunzawm a, Kolkata tlar-hnungte'n Bengaluru tlarhma an chelh meuh lo. Minute 63-naah Kim-a'n goal a khung ta nge nge a, North Korean striker goal khung hi Eugeneson-a siamsak a ni.

Minute nga a liam awrh a, Sunil Chhetri-a ball pet ṭha taka Rehenesh-a'n a dan hnuah Kolkata defender-te'n an tih tur an ti lo a, Sawmtea ke bulah ball a tla. Chaltlang rawlthar hian sawm lohin a tihsual thup nan box pawn aṭangin kawh takin a pet a, Rehenesh-a'n a dan ngheh zawh loh avangin goal-ah a lut.

Bengaluru player zingah Lalchhuan-mawia a khel ṭha takzet bawk a, minute 72-naa tlan lut East Bengal winger Mama tan erawh inkhel thlak danglam turin hun a tam tawk tawh lo.

Sawmtea hi kum 2011-a National Sub Junior Football Championship leh kum 2014-a National Junior Football Championship-a Mizoram champion team-a khel tawh a ni a, I League-a a kum khatna niin a goal hmasa ber a khung.

Hmabak

Bengaluru-in league match khelh tur pahnih la neiin Salgaocar an mikhual dawn bakah Mohun Bagan khelmualah an la lenglut leh dawn. Mahse, Bangalore club hian anmahni hnaih bertu Bagan ai hian khelh khata khel tlem zawk chunga point hniha hma an hruai avangin I League nomawi chawi turin point hnih chiah an mamawh tawh - Bengaluru club tan champion turin vawi khat chak a tawk avangin Bagan-a an inkhel tur hi Salgaocar laka an result a zirin a pawimawh dan a danglam thei.

East Bengal-in match hnih tho khelh la hmabak chungin pathumna dinhmun an luah a, Sporting Goa leh Shillong Lajong la hmachhawn leh tur club hian an hmabak match hnihah hnehna chang ve ve pawh nise I League nomawi chawi tur chuan Bengaluru result-ah an innghah tel a ngai tawh ang.