Si hnih phur Zidane-a'n beisei a nei

Zanin dar 12:15 hian Real Madrid chuan Santiago Bernabeu-ah German club Wolfsburg chu Champions League quarterfinal second leg khel turin an lo mikhual dawn a, goal hnih phur tawh sa mah se Zinedine Zidane chuan semifinal luh beiseina an la neih thu a sawi.

Kar hmasa khan Volkswagen Arena-ah Wolfsburg hian Ricardo Rodriguez-a penalty chhuih luh leh Maximilian Arnold goal khung hmangin Real Madrid hi 2-0 in an lo hneh tawh a, semifinal lut tur-in an goal venhim a tawk. Hetihlai hian an hmachhawn tur hi khawvela hmatawng hlauhawm berte zinga mi Cristiano Ronaldo, Karim Benzema leh Gareth Bale te an nih avangin an hna hi a awlsam ngawt lo ang.

Real Madrid hi goal hnih phur sa ni mah se chak lo zawk tura dah ngawt theih an ni bik lo, tun season-ah an ni chiah hi Champions League-a mahni khelmuala goal la chhuah lo an nih bakah Bernabeu-ah hian UCL match an khelh hnuhnung 34 aṭangin vawi 29 ngawt hnehna an chang thei a ni.

Inkhel tur thlirin Zidane chuan, "Tun season-ah kan ṭhat dan berin kan la khel chhuak lo niin a lang a, hei aia ropui zawka khel tur hian theihna chu kan nei. Goal khung ngei ngei kan ngaih tawh avangin a bul aṭanga a tawp thlengin tihsual nei loa kan khelh a ṭul tawh a, semifinal lut turin kan tan kawng a la awm tih kan hriat a pawimawh," tiin a sawi.

Madrid hian kum 2001-02 season khan khualmualah Bayern Munich chu first leg-ah 2-1 a an hneh loh hnuah Bernabeu-ah 2-0 a hnehna chang letin semifinal an lut a, hemi kum hian champion zuiin a vawi kua nan Champions League nomawi an chawi nge nghe a ni. An sulhnu lo neih tawhte thlir kirin Real fan-te hian Wolfsburg hneh thei tura beiseina an la nei lian hle a nih pawhin a mak lo ang.

Kartawp inkhelah Real hian result ṭha an nei a, an thiampuipa Ronaldo goal khung hmangin Eibar an hneh. Portugal captain hi a zawna season ruk chhung La Liga bika goal 30 khung tling thei hmasa ber a ni hial.

Kum 31-a upa Ronaldo hian tun season Champions League match kua a khelh tawh aṭangin goal 13 a khung tawh a, top scorer a ni mek. Ani hi zanina Real innghahna tur a ni leh ang.

Fan-te puihna an mamawh thu sawiin Ronaldo chuan, "Zanin hian khelmual chhungah player 11 ten ṭha taka kan khelh a ṭul dawn a, chu mai ni loin fans 80,000 zet ten min ṭawiawm ka beisei bawk. Inrintawkna kan nei a, coach berin beiseina a la neih bawk avangin zan chhinchiah tlak tak ni tura kan khelh chhuah theih ka beisei," tiin a sawi.

Real khingpui tur Wolfsburg hian league lamah chhuan tur an nei tam lo hle a, tun dinhmunah point 39 hmuin Bundesliga table-ah pariatna an ni phak hram a, season tharah Champions League khelh chhunzawm an duh a nih chuan he inelnaa an champion hi a ṭul tawh ang.