Schalke lakah Dortmund chak zo lo

Borussia Dortmund chuan Bundesliga hmahruaitu Bayern Munich nen an inkar tih zim theihna hun
ṭha an neih an chhawr ṭangkai zo lo a, Pathianni zan khan khuammualah Schalke nen 2-2 in an inhnehtawk.

Ruhr derby-ah a zawnin Thomas Tuchel-a nauten vawi hnih hnehna an chang tawh a, second half ṭan tirah Shinji Kagawa-a'n goal hmahruai a khung a vangin a vawi thum nan an chak leh tura ngaih a ni hman.

Mah se, Schalke midfielder Leroy Sane chuan an siphurh a sut a, Mattias Ginter-a'n Dortmund tan an goal hnihna khung leh mah se Klaas-Jan Huntelaar-a'n goal khung ve lehin team pahnih ten point khat ve ve an insem a ṭul.

Tun season Bundesliga match 29 khelh tawh aṭangin Dortmund hian point 68 hmuin an club chanchina an record ṭhat ber ṭum an tawng mek. Mahse hmahruaitu Bayern chu point sarihin an phak lo ta a, inkhelh hmabak panga chiah a awm tawh avangin nomawi chawi tur chuan an hna a hautak tawh ang.

Dortmund coach Tuchel chuan, "Tunkarah inkhel hautak kan neih dawn avangin rilruah kan neih a ngai ve tho a, chu chuan kan inkhel-ah nghawng a nei tih a hriat. Beisei bo kan la ni bik lo a, point tam thei ang ber hmuh kan tum," tiin a sawi.

Ningani zan hian Europa League quarterfinal second leg khelh a ni dawn a, Dortmund chu Liverpool khelmual Anfield-ah an leng lut ang, team pahnihte hi kar hmasa khan German-ah 1-1 in an lo inhnehtawk tawh a ni.