Federer a inpeih ta

Tennis khawvela player ropui bera mitam takin an ngaih Roger Federer chu a hliam a dam tawh a, April 10-17 chhunga khelh tur 2016 Monte-Carlo Rolex Masters atan a inpeih tawh.

Roquebrune-Cap-Mar-tin, France-ah nimin aṭang khan Double inelna neih ṭan a ni tawh a, single inelna pawh neih chhunzawm nghal tura tih a ni. Federer hi seeded pathumna a ni dawn a, ani bakah hian player langsar dang Novak Djokovic, Andy Murray leh Rafel Nadal te pawh kumina an Clay Court tournamnet hmasa ber atan Mote Carpo-ah hian an inlan dawn a ni.

Grand Slam vawi 17 champion tawh Federer hi a khup zai a nih avang-in Australian Open semi-final-a Djokovic a hneh loh hnuah court-ah a la inlan leh lo a, final vawi li a lo khelh tawhna hmunah hian a inlan theih tur thu a sawi chiang tawh.

Kum 34-a upa Federer chuan, "Tunah chuan ka rilru leh taksa pawh inkhel turin a inpeih tawh e," tiin a sawi. Kumina Grand Slam inelna pa-hnihna atan May thla khian French Open khelh tur a ni a, he hun atana inbuatsaih nan hian clay court tournament khelh ṭhin a ni.

Kum 2009 French Open champion Federer chuan, "Roland Garros title hi ka ngaihtuah ber a la ni rih lo a, tunah chuan Masters 1000 tour-nament-ah ṭha taka inkhelh phawt ka mamawh," a ti. Swiss thiampuipa hian harsatna dang a nei thut a nih loh chuan thla leh khian Madrid leh Rome-ah inlan a tum thu a sawi tel bawk.