Serie A-ah Napoli-in Juve um ve zel

Inrinni zan khan Juventus-in AC Milan 2-1 a hnehin Serie A-ah point kuain hma an hruai fal hman a, mahse Pathianni zan khan pahnihna Napoli chuan Verona 3-0 a an sawp leh tak avangin inkhelh hmabak paruk la awma champion tum pahnih inthlauhna chu point ruk chiah a ni leh ta.

Napoli hian hrem vangin club top scorer Gonzalo Higuain chhawr thei lo mah se Manolo Gabbiadini, Lorenzo Insigni leh Jose Callejon te hmangin goal an khung a, harsa lo takin point thum an hmu.

Kar hmasaa Udinese an hneh loh ṭuma hnawhchhuah coach Maurizio Sarri chuan Napoli lakah hian a naute enkawl thei lo mah se kartawpa Inter Milan an lenchih hunah chuan a naute a kaihruai thei tawh ang a, match li khel thei lo tura hrem Higuain erawh a la inlan thei dawn lo.

Inkhel dangah season thara Champions League khelh beisei mek Fiorentina chu Empoli lakah 2-0 in an chak lo a, point 56 neiin league table-a pathumna Roma chu point sarih ngawtin an phak lo. Torino chuan Atalanta 2-1 a hnehin Lazio chuan 3-0 in Palermo an sawp bawk.