Kolkata hmaah Delhi an thamral

Indian Premier League khelh mekah Pathianni zan khan Delhi Daredevils an mualpho a, Kolkata Knight Riders hmaah wicket kua ngawtin an tlawm.

Eden Gardens, Kolkata-a in-khelah Delhi batsman-te tan KKR bowler-te an ṭha mah mah a, over 17.4-ah run 98 chiah siamin an vaiin an out vek. Delhi tana run siam hnem ber Quinton de Kock chuan run 17 a tlin hram a, an mualpho chiang hle.

Kolkata club tan Andre Russell leh Brad Hogg-te'n wicket thum ve ve lain Piyush Chawla leh John Hastings-te'n wicket hnih ve ve an la bawk a, Delhi batsman-te tan Kolkata bowler-te hi mangchhia an ni.

Mualneitu Kolkata-in over 14.1-ah run 99 siamin an target an umpha thuai a, wicket pakhat chiah an hloh. Kolkata club tan run 35 a siamin Robin Uthappa out mah se run 38 siamtu captain Gautam Gambhir leh run 15 siamtu Manish Pandey-te a tawp thleng damin an team hi hnehna an chanpui.

Nizan dar 8:00 khan Kings XI Pun-jab leh Gujarat Lions te inhma-chhawnin an result erawh kan hre hman lo. Zanin dar 8:00 hian Royal Challengers Bangalore leh Sunrisers Hyderabad-te an inhmachhawn ve leh ang.