Mizo mipuiin Mizo club ṭawiawm ṭha .Duffy goal hmangin Salgaocar an him

I League kaithar Aizawl FC-in AFC pro licence nei Santosh Kashyap thluak an chelh lo a, Salgaocar-in Darryl Duffy freekick hmangin RG Stadium, Mualpuiah Mizo club 1-0 in an hneh.

Goan club pahnih Salgaocar leh Sporting Clube de Goa ten an elpui North East club Aizawl FC leh Shillong Lajong an hneh avangin chhiarkawp dan thlapin India rama football inelna sang ber an khel zel dawn tih a chiang a, MPL champion erawh Mumbai FC leh Shillong Lajong FC nen tla thei an ni.

Game Plan

Mizo mipuiin I League club neih zel an duh tih lantirin RG Stadium khatin mipui an pungkhawm a, stadium chhak tlang thlengin inkhel entu an ṭhahnem hle.

MPL champion-in captain David Lalrinmuana an chhawr theih loh avangin H. Lalbiakthanga chu midfield laiah khelhna hun pek a ni a, Kawnpui tlangval hian Yuta Kinowaki thawh ṭhin defensive hna thawkin Japanese midfielder hian playmaker hna a chelh thung. Damlohna vanga khel thei lo Brandon VL Remdika aiah MPL best forward F. Lalrinpuia chu winger hna chelh tura luhtir a ni.

Salgaocar lamin foreigner pali a ruala luhtir aiin minute 90 thlir chungin Scottish striker Duffy leh Brazilian defender Eder chu starting eleven-ah dahin a ṭul huna hman theih turin Scottish midfielder Martin Scott leh Cameroonian forward Calvin Mbarga chu bench-ah an ṭhuttir.

Goal khat

Aizawl FC-in goal nawr nghal mah se Salgoacar tlarhnung an ṭhiat thei lo a, India keeper Karanjit Singh tan hna harsa an siam thei lo. Goan club-in an dawhthei a, ball chang tlem zawk nih pawi an ti lo a, counter attack erawh hman ṭangkai an tum hle.

Goan club-in penalty area pawn chiaha an freekick hmuh hmasak Jackichand Singh-a'n hmang ṭangkai thei lo mah se a vawi hnihna erawh Duffy-a'n Aizawl FC keeper Lalawmpuia venna lamah lei hrulin a pet goal - Scottish striker goal khung chhan hi wall pawp vang a ni a, captain Alfred chet sawn vang a ni. Santosh Kashyap hoten uluk zawkin goal an veng zui a, MPL best forward Valpuia chu winger ṭha a ni lo a, defensive midfielder Yuta Kinowaki-a'n David-a hmunruak a hnawh khah zawh loh avangin Aizawl FC-in siphurh sutna hun ṭha an nei lo.

Second half-ah Aizawl FC attack a na sawt a, Salgaocar-in goal venghim turin Scottish midfielder Martin Scott bakah Goan defender Augustin Fernandes an luhtir. Nigerian striker Sunday vanneih ṭum a ni lo a, Aizawl FC striker hian goal ban a pet per a, goal net sir lam a tauh per a, a ball tauh ṭha tak chu Karanjit-a'n a dan sak bawk.

Aizawl FC tan Albert Zohmingmawia hun tawp thleng khel ṭha mah se goal an khung thei tlat lo. Hero of the match-ah keeper Karanjit thlan a ni a, chu chuan inkhelh dan tlangpui a sawifiah.

Lawm leh lungngai

Salgoacar coach Santosh Kashyap chuan, "Ball possession chu Aizawl FC in nei se la, keini lamin result kan neih chuan a tawk. Tawnhriat nei ṭha leh ṭha lo chu inkhel pawimawhah a lang ṭhin, relegation zone chhuahsan tawh mah ila theihtawp kan chhuah zel ang. Bengaluru champion kawng daltu nih kan tum dawn a ni lo a, amaherawhchu kan club ṭhatna turin point thum hlawhchhuah kan tum ang," tiin an Bengaluru nena an inkhel tur a thlirlawk.

Aizawl FC coach Jahar Das chuan, "Tihsual kan nei a, kan rilru a hrehawm hle a ni. Relegate loh theih dan a awm a, vanneihna kan mamawh dawn a ni. Min hrethiam ula, in zawhna zawng zawng ka chhan sak thei lo che u," tiin hrehawm ti tak leh inthiam lo takin post match conference a hmachhawn.

Sporting Goa an him

Pathianni zan khan Shillong Lajong chuan an mikhualna ramah Sporting Clube de Goa chu 5-2 ngawtin an hneh lo a, mualneitu team tan Mehrajuddin Wadoo, Subasish Bose leh Mahmoud Al Amenah-ten goal khat ṭheuh an khung a, India international striker Sumeet Passi chuan goal hnih a khung bawk.

NorthEast club tan Penn Orji chuan goal hnih a khung a, Zodingliana Tochhawng, Isaac Vanmalsawma leh Samuel Lalmuanpuia ten Shillong tan inkhel bul ṭan vek mah se goalkeeper Vishal Kaith chet chhiat zanah Meghalaya club an chhanhim zo bik lo.

Aizawl FC him dan kawng

I League aṭangin Bengaluru FC, Mohun Bagan, East Bengal, Sporting Goa leh Salgaocar te chu chhiarkawp dan ang thlapin an tla thei tawh lo a, inelna ṭantirh aṭangin DSK Shivajians chu him sa an ni bawk.

Tun dinhmuna I League aṭanga tla thei chu Shillong Lajong FC, Aizawl FC leh Mumbai FC te an ni.

Aizawl FC-in April 16, Inrinni hian DSK Shivajians an tlawh dawn a, an chak emaw chak lo a nih pawhin him dan kawng a awm ve ve a, a pawi lai ber erawh an kutah a awm tawh lo.

Pune-ah Aizawl FC hi an chak lo a nih chuan Mizo club tan I League khel zel turin Mumbai FC chuan an match hmabak Shillong Lajong leh DSK Shivajians-ah an chak lo ve ve a ngai.

MPL champion hian an match hnuhnung bera point khat an hlawh chhuak a nih chuan Mumbai FC-in match hniha point khat an hlawhin an him tho ang.

Aizawl FC hian hnehna an chang a nih chuan Shillong Lajong an tla thei ang a, amaherawhchu MPL club hian Lajong aia an head to head a ṭhat loh avangin Shillong club tan him turin point khat a tawk. Mumbai FC nen erawh head to head-ah Aizawl FC an ṭha zawk a, Khalid Jamil-a hote tan him turin match hnihah point li hmuh ngei ngei a ngai thung.