Stoke City khelmualah Reds an chak awlsam

Europa League-a Borussia Dortmund nena inhnehtawk hlim Liverpool-in Premier League lamah pawh result duhawm an neih chhunzawm a, Pathianni zan khan an mikhual Stoke City chu 4-1 in an sawp.

Reds tan Alberto Moreno-a'n goal hmahruai a khung hnuah Bojan Krkic-a'n mikhual team tan an si phurh sut mah se Daniel Sturridge-a'n Reds hma a hruai nawn pui a, English striker goal khung hnu hi chuan inkhel pumpui hi Liverpool chanpual a ni.

Second half-ah Liverpool tan substitute Divock Origi-a'n goal hnih a khung chhunzawm a, mikhual team Stoke-in tih theih an nei tawh lo. Belgian striker hian hat-trick siamna hun ṭha a neih a chhawr ṭangkai thei lo a, Sturridge-a'n mawi taka ball a khawih hnua Moreno ball cross chu hnai tak aṭangin a tauh lut lo.

Liverpool manager Jurgen Klopp-a'n Dortmund nen an inhnehtawk ṭuma starting eleven aṭangin player pasarih ngawt a thlak danglam a, Sheyi Ojo leh Kevin Stewart-te'n Reds tana Premier League inkhel bul an ṭan hmasak ber an khel a, an khel chhe lo.

Reds manager Jurgen Klopp chuan, "Zanin kan khelh danah khan ka lawm takzet a, player kan siksawi nual chungin buaina kan nei lo. Zanina ka player-te kha ka remkhawm dan ang khan tun hmain an khelh ka la ring miah lo," tiin khel ho ṭhang lo player a luhtir thu a sawi.

German coach chuan Sturridge leh tun hnaia khel ṭha thei tak Origi chungchanga zawhna awm chhang nghalin, "Divock hi player naupang tak a ni a, kan nghah peih a ngai ni. Daniel nen ṭha takin an khel dun thei tihah ka chiang a, match tam tak khelh tur kan la neih avangin striker duhthlan tur neih hi a ṭha a ni," tiin a stirker pahnih an che ṭha chu team tan a pawimawh thu a sawi lang.