Sum ngah ngah hmelṭha : City vs PSG
Zanin dar 12:15-ah Manchester City-in Champions League quarterfinal second leg khel turin Paris Saint Germain an mikhual dawn a, team pahnih hi France-ah 2-2 a an lo inhnehtawk tawh avangin khualmuala goal hnih khungtu City dinhmun a ṭha zawk.
PSG-in kum li chhung a zawnin quarterfinal an lut tawh a, semifinal lut turin an paltlang lo vek thung. City tan erawh an rah chin apiang hi an club chanchina bung thar a ni zel tawh. Kum hnih a zawna last 16 aṭanga hnawhchhuah an nih hnuah tun hi quarterfinal an khelh hmasak ber a ni a, an club chanchina semifinal luh hmasak ber record siam turin hun ṭha pekin an awm.
Quarterfinal kalkawng
PSG-in tun season Champions League-ah match kua khel tawhin vawi ruk a chak zawkah an ṭang a, vawi hnih an khingpuite inhnehtawkpuiin vawi khat a tlawm zawkah an ṭang thung.
Manchester khaw club tana hriat nuam lo tur chu khualmualah PSG an tlangnel ṭhin viau hi a ni. Tun season Champions League-a vawi li an zinchhuahah pawh vawi khat chiah tlawmin vawi thum a chak zawkah an ṭang a ni.
City-in match kuaah vawi nga hnehna changin vawi hnih an khingpuite an inhnehtawkpui a, vawi hnih an tlawm bawk. Etihad Stadium-a Champions League match li an thlenah vawi hnih an chak thei a, vawi khat a tlawm zawkah ṭangin vawi khat an khingpui an inhnehtawkpui thung.
Manuel Pellegrini-a naute tan an dai ngai loh ram daia semifinal lut turin goal chhuah loh a tawk a, khawvela tlarhma nei ṭha ber pawl an nih miau avangin defensive game erawh an khelh a beiseiawm loh.
Team pahnih
Manchester City tan inhliam Vincent Kompany leh Fernando-te chhawr theih an la ni dawn lo a, Yaya Toure dinhmun a chiang lo bawk - hei hi City fan tan hriat nuam a ni hauh lo ang.
Kevin De Bruyne, Samir Nasri leh Fabian Delph-te an dam tawh a, De Bruyne bik phei chu khelmual chhungah a dam tawh zia kan hmu. Raheem Sterling chu 100% a in fit hnai tawh ni a sawi a ni a, zaninah a inlan dawn leh dawn loh a la chiang lo.
City tana chanchin lawmawm chu hrem vanga Blaise Matuidi leh David Luiz-te French club tana an inlan thei lo tur hi a ni ang. Paris club-in inhliam Marco Veratti leh Javier Pastore-te an chhawr theih dawn leh dawn lohah an chiang lo bawk.
Mahse, France club hi lungphang lutuk tur erawh an ni lo. Zlatan Ibrahimovic, Angel Di Maria, Edinson Cavani, Thiago Motta leh Thiago Silva-te an la kawl miau avangin eng team pawh hneh turin an
ṭha tawk.
Manager thukhawchang
Manchester City manager Manuel Pellegrini chuan, "Khawvela team ṭha berte nena inel turin kan ṭha tawk a, a sang ber thleng turin theihna kan nei a ni. Kan inringtawk tur a ni a, ka player-te pawh season tin hma an sawn avangin an inringtawk em em a ni. Europe-a inkhelh thiam lo angin sawisel kan ni ṭhin a, mah se Europe-a inkhelh dan kan hria tih hi ka sawi duh a ni," tiin semifinal-ah City hruai kai ngei a tum.
PSG manager Laurent Blanc chuan, "Paris-a kan inkhel kha ka ennawn leh
ṭhin a, chak phu zawk chungin kan chak lo a ni. Mahse, tunah chuan second leg atan inbuatsaih a hun leh tawh. Kan match hmasa ang thoin a harsa dawn tih ka hria a, mah se hnehna kan chang thei tih erawh kan hria," tiin kal zel an tum thu a sawi.