South Africa tana khelh rilruk Pietersen

England batsman hlui chanchin ngah tak Kevin Pietersen chuan a pianna ram South Africa tana inkhelh a ngaihtuah thu a sawi.

Kum 35-a upa bastman hi England chuan kum 2014 khan an ram tana khel thei tawh lo turin an ban. Pietersen hi kum 2018 thleng England-in ram tana khel tura an ko tawh lo a nih chuan South Africa tan a khel thei tawh dawn a ni.

International cricket-a a inlan tawh loh hnua Twenty20 lama club hrang hrang tana khel tawh Pietersen chuan, "South Africa tana khelh hian ka rilru a luah a, mahse kum khat aia tam ka la nghah a ngai. England-in min koh chhunzawm leh zawm lohah pawh a innghat ang," tiin England tana khelh chu a rilrua a la awm reng thu a sawi lang nghal.

Indian Premier League-a Rising Pune Supergiants tana khel Pietersen hian England team aṭanga ban a nih hlimin a lehkhabu ziahah England and Wales Cricket Board (ECB) chu na takin a sawisel zui.

Kum 2015 khan ECB chairman thar Colin Graves-a'n Pietersen-a tan England-ah hmun a la awm thu sawi mah se cricket director Andrew Strauss-a'n Pietersen chu England tan koh a nih tawh loh tur thu a sawi zui a, England ODI captain Eoin Morgan chuan Andrew Strauss thusawi hi a ṭawmpui bawk.