Vawiin aṭangin quarterfinal

FIFA Santosh Trophy quarterfinal chu vawiin aṭangin khelh ṭan a ni dawn. Chawhnu dar 2:30 hian Services leh Railways te an inkhel dawn a, zanin dar 7:00-ah Goa leh Delhi te an inkhel ang.

Mizo tlangval Zothanpuia (Thangpuia) telna Services hi tun inelnaah tlarhnung phui ṭha ber an ni a; champion ngei tumin Arunachal Pradesh an pan. Itanagar-ah Services hi player leh coaching staff belhkhawmin 32 an kal a, hei hian champion an tumzia a pholang.

Chutihrualin Services ang thoin Railways hian player ṭha an la khawm a, quarterfinal a nih tawh avangin an ṭhat dan berin an khel ang. Railways-in goal venhim an ngai pawimawh dawn a, Services tan goal khung a harsa dawn.

Goa leh Delhi inkhel pawh hi hmuhnawm viau turah a ngaih theih. Goa hi group A pahnihna ni mah se Services hneh thei leh hneh loh la tawng lo an ni a, khelh dan phung nghet neiin counter attack-ah an nawr na ṭhin hle. Delhi erawhin attacking football an khel a, goal 10 khung thei mah se goal 10 an chhuah avangin quarterfinal-ah goal venhim an ngai pawimawh ang.

Inkhel hi Arunachal Pradesh Football Association YouTube channel hmanga en theih a ni.