A suttu zawk Chelsea

Gtech Community Stadium-ah Inrinni zan khan Chelsea an lenglut a, Inrinni zan khan Brentford nen 2-2 in an inhnehtawk. London club hian Nicholas Jackson hmangin khung hmasa mah se Brentford-in Mads Roerslev leh Yoane Wissa hmanga an chhanlet avangin Blues hi a suttu zawk an ni. Minute 83-naah Axel Disasi-a'n si phurh sutna goal a khung a, Chelsea-in point khat an hlawh chhuak.

Mauricio Pochettino-a'n point thum hmanga a kum 52 pian champha lawm ngei tumin Bees lakah a naute attacking football a khelhtir a, inkhelh ṭantir lamah Jackson hlauhawm nghalin minute 35-naah ṭha zetin a tauh lut.

Mahse, Brentford-in halftime an hmang ṭha a, second half-ah an khel ṭha ta zawk. Roerslev-a'n minute 50-naah si phurh sutna goal a khung a, midfielder Vitaly Janelt-a'n goal ban a pet per bawk.

Mualneitu goal bawh a na a, Chelsea-in counter attack hmanga goal khungna remchang an nei - goal hmaah Cole Palmer a hriam lo a, goal pawnah chiah a pet chhuak.

Bees tan Wissa-a'n minute 69-naah bicycle kick hmangin mawi zetin a khung a, mualneitu lam an phur hle. Hemi hnu hian Sergio Reguilón-a'n goal ban a tauh per leh bawk a, Chelsea an buai.

Mahse, 83-naah Bees tlarhnung an inthlahdah zeuh a; Palmer-a ball vawrhluh chu Blues defender Disasi-a'n a tauh lut. Chelsea-in point khat hlu tak an sual chhuak a, amaherawhchu an chak zawh loh avangin table-a 10-na china inpetkaina hun ṭha an bawhpelh.