MSL9: Champion tum Zarkawt BCA-in final an thlir

Mizoram Super League season 9 semifinal game 1 hmuhnawm takah Zarkawt BCA-in 93-85 in Champhai District Basketball Association an hneh a, an ke lehlamin final an rap ta, tiin a sawi theih - mahse, Champhaiin semifinal game 2 khelh tur a la awm tih an hria a, awlsam taka BCA hi thlah an tum lo.

Champhai tan Tevis Ryan Robinson Jr a langsar fal nalh a, American player hian point 32 zet a score - mahse, a team chakpui nan erawh a tawk zo lo a, Champhai tan semifinal game 2 nghakhlel taka thlir mai loh chu tihtheih a awm lo.

Semifinal game 2 hi March 5, Thawhlehni zan dar 8:00-ah Zarkawt BCA leh Champhai hian an khel zui dawn a, zanin dar 8:00 hian semifinal lehlamah Bungkawn LB Associates leh Khatla TBL te an intawng ve leh bawk ang.

BCA an chungnung

R. Dengṭhuama Indoor Stadium, Mualpuia semifinal inkhelah Zarkawt BCA-in first quarter aṭangin inkhel an thunun nghal a, MSL-a vawi li ngawt champion tawh team hian tawnhriat ngah leh boruak sang ngam tawh an nihna an pholang.

BCA hian first quarter hi 34-19 in an la a, second quarter-ah pawh 31-23 in an chungnung leh a, harsatna nei loin an chak mai dawn nia ngaihna a awm - mahse, Champhai lamin ngaihdan dang an nei a, awlsam taka BCA chhuah zalen an tum lo.

Third quarter-ah Champhai-in semifinal lut thei an nih chhan an pholang a, quarter hmasa lama talbuai team hian 26-12 in third quarter hi an la. Mahse, fourth quarter-ah BCA an rawn ṭang mar leh hret a, Champhai hian 17-16 in la leh mah se, quarter hmasa lama an hnufual lutuk rah sengin, uiawm takin, 93-85 in an tlawm.

A la tawp lo

BCA-in boruak sangah tawnhriat nei ṭha player an neih an vanneihpui a, Lalnunpuia Renthlei chuan point 25 neiin, South Sudan international Emmanuel Malou (24), Matthew Remtluanga Sailo (17) leh Lalrina Renthlei (14) ten an pui ṭha viau bawk - game 2-ah pawh anni bawk hi innghahna tur an ni leh dawn.

Champhai tan US tlangval Tevis Ryan Robinson Jr langsar viau mah se, player dang zingah point 15 score kai thei dang pakhat chiah a awm a, Lalsangliana'n (20 pts) a ti ṭha thawkhat viau - game 2-ah an tawp loh nan, Thawhlehni zanah chuan player dang chet ṭhat tel a ṭul.

Hei erawh hriat a ṭha - anni aia tawnhriat nei ṭha leh boruak sanga tal tam zawk Zarkawt BCA laka an hnufual viau hnuin, Champhai BCA an insiamṭha thei a, game 1-ah 'comeback' zo ta chiah lo mah se, game 2-ah chuan 'thih leh dam' karah an leng tih hriain, an hriam lehzual sawt ang.

Bungkawn vs Khatla

Zanin dar 8:00-ah semifinal lehlam khelh a ni ve leh dawn a, Bungkawn LB leh Khatla TBL intawng tur hi basketball mai ni lo, tualchhung infiamna ngainatuten an en châk a ni - a hmuhnawm loh ring suh.

Khatla TBL hi champion lai niin, an nomawi humhim ngei an duh dawn - MSL-ah fans nei ṭha ber pawl an nih ṭhin avangin zaninah pawh fans an nei ṭha leh ang tih a chiang a, fans puihna nen Bungkawn hneh tumin an

inbuatsaih dawn.

Bungkawn LB Associates-in fans nei tlem zawk nih an duh dawn lo. Zaninah a si ruk lain an thawk ang tih a chiang a, Khatla TBL hi hneh nawn an châk ang - league round-a an intawn ṭumin 79-77 in an hneh a, an inthlau lo hle.