Spurs an chak ve leh ta

Season ṭantir lama champion hial sawi ri ve hman Tottenham Hotspur-in an league match hnuhnung bera Wolverhampton Wanderers an ngam loh hnuin hnehna an chang ve leh ta a, Inrinni zan khan an mikhual Crystal Palace chu 3-1 in an hneh.

Palace hian Eberechi Eze hmangin minute 59-naah goal hmahruai an khung a, mahse, Spurs hian Timo Werner, Cristian Romero leh captain Son Heung-min hmangin an chhanglet a, 3-1 in an chak - table-ah pangana an ni a, palina Aston Villa chu point ngai an phak lo mek. Match khatin an khel tlem thung.

January-a RB Leipzig aṭanga loan-a Spurs zawmtu Werner hian first half-ah goal khung tur chianga ngaih a khung lo a, second half-ah Spurs tana a goal hmasa ber a khung ta tho.

Werner chuan, "Chawlhlawkah khan ka khelhpuiten min fuihin, theihtawp chhuah zel turin min ti. Min sel lotu ṭhian neih chu a nuam a, min thlawp ṭha takzet - hei hian keimah chauh ni loin, team pumpui a pui a ni," a ti a, Spurs tana a khelhpuite a fak.