A hun têa rah ṭhin Darwin Nunez
Nottingham Forest khelmualah Liverpool fan-ten ngui takin an sana an en a, khelmual sira Jurgen Klopp leh a coaching staff-te hmelah pawh hlauhthawnna a khat tih hai rual a ni lo - hetihlai hian minute 90 a pel tawh a, hun pek belh a ni tawh a, score chu 0-0 a ni.
Liverpool an chak zo lo a nih chuan an elpui Manchester City leh Arsenal tan kawng zau taka hawnin a awm dawn tihna a ni a, hei hi Liverpool fan-ten an hai lo. Mahse, referee-in hun tawpna ham tura a hamrik a lek kan lai takin football ropuina a thleng.
Bench aṭanga luhtir Darwin Nunez chuan ṭha lutuk tak maiin goal a tauh lut a, hun a tawp zui! Tlak hlau Forest khelmualah 1-0 in Reds an chak a, Premier League table chung berah an awm chhunzawm.
A har a ni
Kar hmasa Pathianni khan League Cup final-ah Liverpool-in 1-0 in Chelsea an hneh a, Nilaini zan khan FA Cup fifth round khel zuiin, Southampton chu 3-0 in an hneh a, Inrinni zanah league match an nei leh nghal bawk!
Reds hian hliam vanga senior player engemaw zat an la chhawr theih loh bawk avangin player chhawr rimte an chau a, Liverpool-in ṭum dang angin an game hmuhnawm an pho chhuak thei lo, Luis Diaz leh Andy Robertson ten an chance neih an chhawr lo zui.
Klopp-a'n a naute auh phur tum viau ṭhin mah se an chau tih hai rual a ni lo a, minute 60-naah bench aṭangin hliam dam hlim Nunez leh Wataru Endo te luhtir mah se, thawnthu a danglam hleithei lo.
A tawpah Nunez
Liverpool hian point khatah lungawi an zir dawn niin a lang hman. Mahse, hun pek belh minute kuanaah Nunez a inlar a, February 17-a Brentford laka a inhliam hnua Reds tana a inlan leh hmasak berah chakna goal a tauh lut!
An chak zo dawn lo emaw tih hnuah Reds-in hnehna an chang a, kha lo liama champion zia a awm chuang em ni? Kum 24 mi Nunez hian Reds tan inelna hrang hrangah match 38 khelin goal 14 a khungna a ni ta a, assist vawi 11 a nei ta bawk.
Kum 1984 hnua a vawi khat nan City Ground-a league match khelhah Liverpool an chak a, player inhliam Nunez leh Endo bakah Dominik Szoboszlai a lo kir leh tak bawk avangin Reds fan-te lawmna belhchhahin a awm.