Lianzuala goal khung zanah Mumbai chak

Inrinni zan khan Lallianzuala Chhangte chuan Mumbai City tan goal a khung a, ISL inkhelah Mumbai hian 3-2 in Punjab FC an hneh - Mumbai hian Odisha hnungzuiin playoff semifinal an khel dawn chiang tawh.

Mumbai tan Lianzuala hian minute 16-naah goal hmahruai a khung a, ISL hero of the league ni lai Lianzuala tan league match 17-a goal thum a khungna chiah a ni a, assist vawi li a nei bawk.

Punjab club-in first half chhungin Madih Talal leh Wilmar Jordan Gil hmangin an chhanglet a, 2-1 a ni. Mahse, second half-ah Mumbai tan Iker Guarrotxena chuan goal hnih a khung ve leh a, 3-2 in an chak. Mumbai tan Hmingthanmawia Ralte chu bench aṭanga luhtir a ni.

Inrinni zan inkhel dangah Bengaluru chuan Javi Hernández goal hmangin, 1-0 in Kerala Blasters an hneh a, Bangalore club tan midfielder ṭhangduang Lalremtluanga Fanai chu bench aṭangin a lut.

Khalid Jamil hoa league match nga a zawna tlawm an neih loh hnuah Jamshedpur FC-in ngam loh an tawng a, Zirtawpni zan khan Mohun Bagan Super Giant chuan 3-0 in an sawp. Kolkata club tan Dimitrios Petratos, Jason Cummings leh Armando Sadiku ten goal khat ṭheuh an khung a, Men of Steel lamin a chhanletna tur an nei lo.

Bagan tan midfielder Lalrinliana Hnamte chu bench aṭanga luhtir a ni a, Jamshedpur lamah PC Laldinpuia chu bul ṭantir niin, minute 40-naah Ricky Lallawmawma a lut bawk.