Real an chak zo lo - Bellingham an hnawt chhuak

Valencia khelmualah 2-0 a an hnufual hnuin Real Madrid-in an si phurh sut zoin, 2-2 in inkhel a tawp a, hun pek belhah chakna goal khunga an inngaih avangin point khatah an lungawi lo.

Real tan hian Jude Bellingham chuan hun pek belhah chakna goal a khungah a inngai a, mahse, a goal khung hma hian referee-in hamrik a ham hman - Real an lungawi lo a, referee an hual. Bellingham a lungawi lo fal a, red card a hmu zui.

Valencia hian an mualah Hugo Duro leh Roman Yaremchuk hmangin goal an khung hmasa a, 2-0 a ni. Real-in Vinicius hmangin si phurh an sut zo a, Bellingham hmanga an khung belh erawh pawm a ni ta lo a, point khata lungawi an zir a ṭul.

Real-in La Liga table chung ber an luah chhunzawm a, an hnuai chiaha awm Girona aiin point sarihin an la sang zawk - nizan khan Girona an inlan a, an result kan hre hman lo. An chak a nih chuan Real nena an inkar hi point li chauh a ni zui ang.

Beisei loh lam

Valencia khelmualah chak beiseiin Real an lenglut a, hliam vanga kar thum zet a chawlh hnuah Bellingham chuan khelmual a rap leh ta bawk. A tawi zawnga sawi chuan Real boruak a ṭha a, point thum aia tlem an mitthla lo.

Mahse maw, hei hi football a ni miau a, beisei loh thil a thleng fo ṭhin. Valencia khelmualah pawh an league match hnuhnung palia vawi khat chiah chak Valencia lamin goal an khung hmasa zawk - minute 27-na lekah Fran Perez-a shot sual chu Duro chuan goal hmahruai ni turin a tauh lut.

Valencia an phur laklawh. Minute thum chiah a liam hman a, Real defender Dani Carvajal-a che sual. Keeper Andriy Lunin hnena ball a pek let chu Lunin-a'n a man hmain Roman Yaremchuk-a'n a lo lak khalh a, Ukraine tana a khelhpui keeper hi tlan helin goal ruakah a khung.

Minute 30 chhung lekin Valencia-in 2-0 in hma an hruai a, mahse, Real an beidawn phah lo. Phurrit lutuka chawlhlawk hman bik duh loin, first half hun pek belhah Vinicius chuan Real tan si phurh a sut ṭhen a, 2-1 in chawlhlawk hman a ni.

Inkhel hmuhnawm

Real-in chak loh an duh lo. Second half ṭantirhah thiampuipa Bellingham a inlar a, ṭha zeta Valencia centre back Yerson Mosquera a bum hnuah shot mah se, Valencia keeper Giorgi Mamardashvili chuan ṭha zetin a dansak.

Valencia an awm mai mai bik lo. Diego López chuan chance duhawm a nei ve zui a, mahse, Spanish forward-in hnai set sawt aṭanga a pet chu Lunin chuan a hming chher nan a lo hmang. Minute 75-na a ni a, Real lamin goal an khung ta nge nge.

Bench aṭanga luhtir Brahim Diaz-a siamsak chu Vinicius chuan a tauh lut a, 2-2 a ni. Real tan beiseina a vul thar a, point thum hawn ngei tumin an bei chhunzawm. Beisei ang erawhin thil a thleng thei bik lo a, Valencia an hlauhawm zawk em ni chu aw, tihtur a ni.

Valencia tan tun season-a goal 12 khung tawh Duro chuan penalty a hlawhchhuak a, mahse, video assistant referee rawn a nih hnuah referee-in a thutlukna a sut a, substitute Peter Gonzalez-a 'shot' Lunin-a'n a lo dansakte chu pui tak a ni - Peter hi Real aṭangin Valenica-ah hian loan-in a khel.

A tawp buaina

Hun pek belhah pawh team pahnihin chak tumin an bei a, Luka Modric-a corner aṭanga ball kal chu Valencia keeper Mamardashvili chuan lo hnek chhuakin, hei hi Brahim-a ke bulah a tla.

Vinicius-a goal khung tur siamsaktu Brahim hian box chhungah ball hi a thlawh lut a, boruaka ball a awm lai takin referee Gil Manzano chuan hamrik a ham - Bellingham chuan Brahim Diaz-a ball cross hi a tauh lut a, chakna goal a khungah a inngai.

Mahse, referee-in hamrik a ham hman a, goal-ah a pawm lo. Real an lungawi lo a, kar thum zet hliam vanga a chawlh hnuah lo kir Bellingham-a'n a lungawi lohna a tilang nasa zual a, red card pek zui a ni.

Real an chak zo lo a, Valencia tan point khat hlu tak a ni. Valencia hi February 23 khan an khawpui hmun pakhata kangmei chhuak vangin mi 10 velin nunna an chân a, kha thil a thlen hnuah tun hi an inkhelh leh hmasak ber niin, Real laka point an hlawh chhuak hi an tan a hlu zual.

March 01, Zirtawpni Zan

Celta Vigo 1 - 0 Almeria

CEL: Óscar Mingueza 73'

March 02, Inrinni Zan

Sevilla 3 - 2 Real Sociedad

SEV: Youssef En-Nesyri 11', 13'; Sergio Ramos 65'

RES: André Silva 45+5'(P); Brais Méndez 90+2'

Rayo Vallecano 1 - 1 Cadiz

RAY: Florian Lejeune 78'

CAD: Javi Hernández 90+1'

Getafe 3 - 3 Las Palmas

GET: Jaime Mata 11'; Mason Greenwood 14'; Nemanja Maksimovic 45'

LAS: Sandro Ramírez 35'; Sergi Cardona 50'; Munir El Haddadi 57'

Valencia 2 - 2 Real Madrid

VAL: Hugo Duro 27'; Roman Yaremchuk 30'

REA: Vinícius Júnior 45+5', 76'

Team Dinhmun

# Team Pld W D L GF GA GD Pts

1 Real Madrid 27 20 6 1 56 18 38 66

2 Girona 26 18 5 3 57 32 25 59

3 Barcelona 26 17 6 3 56 34 22 57

4 Atlético Madrid 26 16 4 6 52 28 24 52

5 Athletic Bilbao 26 14 7 5 46 26 20 49