Player pariata khel Lazio an tlawm

Zirtawpni Zan Serie A inkhelah Lazio chuan AC Milan mikhualin, 1-0 in an tlawm - he inkhelah hian Lazio player pathum ngawt hnawhchhuah an ni a, Maurizio Sarri enkawl Lazio hian player pariat ni chungin inkhel an khar!

Milan tan Noah Okafor chuan minute 88-naah inkhela goal awmchhun a khung a, season thara Champions League khelh an beiseina an chhi nung ve zel - Milan hi league table-ah pathumna an ni mek a, hmahruaitu Inter Milan chu point 13-in an phak lo mek, pahnihna Juventus chu point khat lekin an phak lo tawh.

Juve hi nizan khan an inlan a, an result kan hre hman lo. An chak a nih chuan Milan nena an inthlauhna hi a la danglam leh ang - zaninah Inter Milan an inlan ve dawn chauh thung.

Thawhlehni zana Champions League round of 16 second leg-a Bayern Munich lenchilh tur Lazio erawh table-ah pakuana an ni mek a, league match 26-ah point 40 chiah an la nei.

Lazio player zingah Luca Pellegrini chu hnawhchhuah hmasak ber a ni a, Christian Pulisic laka a foul avangin minute 57-naah a yellow card pahnihna pek a ni. Hun pek belhah Adam Marusic chu referee laka a lungawi lohna a lantir nasat avangin hnawhchhuah a ni a, hun pek belhah vek Matteo Guendouzi chu hnawhchhuah a ni bawk.

Guendouzi red card hmuh chhan pawh hi Pulisic-a ni a, American forward hi Guendouzi lakah foul-in, Arsenal midfielder hlui hian Pulisic hi thinrima a nam zui avangin red card pek a ni. Lazio player pathumin yellow card an hmu bawk a, Milan pawh an bang bik lo - an player paruk chu yellow card pek an ni.

Daniele De Rossi enkawlna hnuaiah AS Roma-in hma an sawn zel a, Inrinni zan khan Monza chu 4-1 in an sawp - De Rossi hoa league match sarih an khelh tawhah vawi ruk an chakna niin, an tlawm awmchhun hi 4-2 a hmahruaitu Inter Milan an ngam loh kha a ni.

Roma tan Lorenzo Pellegrini, Romelu Lukaku, Paulo Dybala leh Leandro Paredes te chuan goal khat ṭheuh an khung a, Monza tana Andrea Carboni goal khungin awmzia a nei phak lo.