Bayern an chak zo lo leh ta

Champion duha Bayern Munich pantu Harry Kane tan champion nomawi a hla tual tual - Zirtawpni zan khan Bundesliga inkhelah Bayern hian SC Freiburg chu 2-2 in an inhnehtawkpui a, hmahruaitu Bayer Leverkusen chu point sarihin an phak lo mek.

Nizan khan Xabi Alonso enkawl Leverkusen hi an inlan a, an result kan hre hman lo - an chak a nih chuan Bayern nena an inkar hi point 10 ngawtin a zau leh dawn a, Thomas Tuchel leh a naute tan league nomawi beisei a harsa tawh ang.

Freiburg hian minute 12-naah Christian Gunter hmangin goal hmahruai an khung a, Bayern hian Mathys Tel leh Jamal Musiala hmanga chhangletin, point thum an hlawh chhuak mai turah an inngai hman.

Mahse, hun tawp nan minute thum chauh a awm tawh tihah Lucas Holer chuan Freiburg tan a khung ve leh a, Bayern-in goal dang an neih theih loh avangin point an insem.

Bayern coach Thomas Tuchel chuan, "Awmze nei loin kan khel a, kan ti ṭha tawk lo. Kan position-ah awm loin kan khel nuai nuai a, kan nawr dawnin ball kan hloh zel a, counter hmanga min nawrna chance kan siamsak zel a ni.

"Inkhel ṭantir lam kha chu kan ti mai mai a, kan zir loh ang hlirin kan ti a, kan sawi angin kan awm lo. Minute 85-naa 1-0 a tlawmsa ang maiin kan khel a ni," a ti a, a naute khelh danah a lawm lo.

Bayern hi Bundesliga-ah season 11 chhung a zawnin an champion tawh a, season tawp ruala chhuak tur Tuchel tan nomawi chawi loh chu mualphona tawpkhawk a ni ang.