PSG-in goal an khung lo

Zirtawpni zan Ligue 1 inkhelah Paris Saint-Germain-in goal an khung lo a, khualmualah AS Monaco chu 0-0 in an inhnehtawkpui - PSG-in goal mamawh mah se, an player langsar ber Kylian Mbappe chu half time-ah lakchhuah zui a ni a, coach Luis Enrique chuan a thutlukna a nih thu a sawi.

PSG boss chuan, "Kylian Mbappe tel lo hian kan khelh a la ngai dawn tho tho a, Monaco laka ka lakchhuah pawh kha 100% in ka thutlukna a ni - team tana ṭha turin thutlukna ka siam," a ti a, Mbappe tel loa inkhelh an zir a ṭul thu a sawi.

Mbappe hi Randal Kolo Muani chuan a thlak a, season tawpah Real Madrid a zawm dawn avangin Enrique thusawi hi a dikna chen a awm. Mbappe hi lakchhuah a nih pawh hian, bench-ah a ṭhiante zinga ṭhu loin, a jersey a thlak a, a hmuna an inkhel entu a nute ṭhutna lam panin, chhungkuain second half hi an en ho a ni.

PSG hian hnehna chang zo lo mah se, league hmahruaitu an la ni reng tho a, anmahni hnaih bertu Brest aiin point 12 ngawtin an la sang zawk - match khatin an khel tam thung.