Atletico mikhual tur Barcelona la him lo

Zanin dar 12:15 hian Vicen-te Calderon Stadium-ah Champions League quarterfinal second leg khel turin Atletico Madrid chuan Barcelona an lo mikhual dawn a, champion lai Catalan club hian kar hmasa khan Nou Camp-ah 2-1 in hnehna lo chang tawh mah se semifinal lut tura dah nghal ngawt theih an la ni bik lo.

First leg-a goal hmahruai khungtu Fernando Torres chu hnawhchhuah zui a nih avangin zanin hian a hmel kan hmu thei dawn lo a, Catalan club tana goal hnih khungtu Luis Suarez erawh Atletico Madrid defender Filipe Luis a pet vanga hrem theih tur niin lang mah se hremna a hmachhawn loh avangin a hmel kan hmu dawn thung.

Fimkhur ngai pahnih

Atletico Madrid hian Barce-lona nen an inhmachhawn hnu-hnung pangaah vawi li ngawt hnawhchhuah an tawk a, ṭum khat chauh player 11 ni chungin an khel tluan. Inelna lianah chuan player pakhat kim lo a lansarh ṭhin em avangin Diego Simeone-a naute hi inkhelh laia an thinur a nih pawhin an insum theih a ṭul tawh ang.

Atletico leh Barca te hi inelna hrang hranga an inhmachhawn hnuhnung pasarihah Barca-in hnehna an chang vek a, Vicente Calderon-ah bik an intawn hnuhnung pahnihah Atletico an chak lo ve ve bawk.

Hetihlai hian Barcelona pawh ngaihṭha taka awm veng veng thei an la ni bik lo a, European match-ah bik Spanish club an hmachhawn hnu-hnung vawi 13 aṭangin
ṭum khat chauh goal chhuah loh an nei a, champion nomawi humhim tur chuan an tlarhnung an tih chak a ṭul ang.

Luis Enrique naute hi an boruak ṭhat ber lai a ni bik lo a, kartawp khan La Liga-ah Real Sociedad chu 1-0 a hneh loin league-ah Atletico ai hian point hum chiahin an sang tawh.

Tute nge inlan ang?

Barcelona lamah hliam vang-in Jeremy Mathieu, Adria-no, Aleix Vidal leh Sandro Ramirez te dinhmun a chiang lo. Starting eleven tura beiseite chu Ter Stegen – Dani Alves, Jordi Alba, Javier Mascherano, Gerard Pique – Ivan Rakitic, Serigio Busquets, Andres Iniesta – Lionel Messi, Luis Suarez leh Neymar te an ni.

Club top scorer nilai Suarez chu Barca innghahna tur a ni leh dawn a, Uruguay internatinoal hian tun season inelna hrang hrangah goal 43 a khung tawh. Ani bakah hian senior career-a goal 500 na tur nghak mek Messi leh Neymar te hi ven uluk a ngai ang.

Atletico tan Torres chu hrem vangin a inlan dawn lo chiang a, Tiago leh Jose Gimenez te hliam vangin an dinhmun a chiang lo bawk. Simeone-a'n Barca lehthal turin Oblak – Felipe Luis, Stefan Savic, Diego Godin, Juanfran – Koke, Gabi, Saul Niguez, – Antoine Griezmann, Yannick Ferreira Carrasco leh Angel Correa te chu inkhel bul a ṭantir a rinawm.

Tun season-a goal 27 khhung tawh France forward Griezmann hi en bik hlawh turte zinga mi a ni dawn a, ani hian league-ah a zawnin match ruk chhung goal a khung tawh a ni. Goal khung lam ai mahin Simone-a naute hi a venhim lamah an ṭha zawk a, La Liga-ah goal 16 chauh la chhuahin record nei ṭha ber an ni mek a, Barca lakah hian goal khat an khung thei hlauh a nih chuan semifinal lut turin a venhim ngawr ngawr chu an huphurh hran tawh bik lo ang.

Eng nge an sawi?

Barca tana match 100 khel tling chiah Rakitic chuan, "Kan match hnuhnung bera Sociedad nen kan inhmachhawn ṭuma kan khelh ang kha chuan kan khel thiang tawh lo. Keini hi chu chhungkua ang mai kan ni a, inlungrual taka kan thawhhona hi kan chakna hnar a ni. Atletico hi team
ṭha an nih avangin fimkur leh fing taka kan hmachhawn a
ṭul ang," tiin a sawi.

Inkhel thei dawn lo mah se Torres a awm hle hle thei lo a, beisei an la neih thu sawiin Liverpool striker hlui chuan, "Nou Camp-ah pawh khan player 11 in khel tluan ngat ila chuan hnehna chang thei tur kan ni. Kan chak loh hnu ni hnih lekah kan insiamṭha thei a, zaninah pawh hian eng nge lo thleng dawn a hriat lawk theih loh," a ti.