Marin a inringtawk

China hian badminton inelna an thunun ṭhin nia ngaih a ni a, Chinese player-te chu hneh theih loh ang maia ngaih an ni ṭhin. Mahse, Carolina Marin chuan he ngaihdan pakhat hi a rawn vaw chhia a, tunkar chhunga khelh tur Singapore Open atan a inrintawk thu leh Chinese player-te hneh tura theihna a neih thu a sawi.

World number 1 Marin chuan, "Tunhma nena khaikhin chuan a inang tawh lo a, Chinese player hmachhawn hi kan huphurh tawh bik lo. China bang pui hi kan ṭhiat thei tih kan hre tawh a, inrintawkna sang tak nen Chinese player-te kan hmachhawn thei tawh a ni," tiin a sawi.

Kum 22-a upa Marin hi badminton powerhouse China run mektu nia ngaih a ni a, Spanish shuttler zingah world title leh All-England Open title la thei hmasa ber a ni.

All England Open bikah hian Chinese shuttler ten kum 18 chhunga vawi 14 ngawt champion nihna an hauh tawh chu kum 2015 March 8 khan a rawn thai bo a, kuminah Japanese shuttler Nozumi Okuhara a champion ve leh avangin badminton inelna ngaihhlutah a zawnin Chinese player an champion lo!

Nikum November thlaa Hong Kong Open-a a champion hnuah hlawhtlinna la chang leh lo mah se a lungnngaih loh thu sawiiin,"Inelna zawng zawngah champion duh mah ila a theih bik lo, world number 1 ka nih avangin ka chungah mawhphurhna sang tak a awm bawk. Mahse ka buai phah lo a, theihtawpa inkhelh tawp hi ka duhdan a ni," a ti.

World champion nilai Marin chuan Malaysian Open bak hi August thla a neih tur Rio Olympic hma chuan Superseries event-ah inlan a tum tawh loh thu a sawi tel bawk.