Milan coach Sinisa Mihajlovic an ban

AC Milan chuan an coach Sinisa Mihajlovic chu nimin khan an ban a, an youth-team coach Cristian Brocchi chu tun season chhung atan coach puitling ni turin an la lut nghal.

Mihajlovic hian ni-kum June thla khan Filippo Inzaghi thlakin Milan a enkawl ṭan a, San Siro-ah thla 10 hun a hman chhung hian beisei ang result a nei thei lo.

Tun dinhmunah Milan hian league match 32 an khelh tawh aṭangin point 49 an hmu tawh a, Serie A table-ah paruk-na dinhmun an luah hram. Amaherawhchu, Mihajlovic hi hlawh-chham der a ni bik lo, a team hi Coppa Italia final a luh pui tawh.

Inrinni khan Milan hian Juventus 2-1 in an hneh lo a, a zawnin match nga chhung ngawt chakni hmel an hmu tawh lo. League table-a pathumna Roma chu point 15 zetin an phak loh tawh avangin season thara Champions League khelh beiseina pawh an nei tawh loa ngaih a nih mai bakah hmahruaitu Juventus chu point 27 tehmeuhin an phak lo mek bawk.

Serie A champion vawi 18 ni tawh Milan chuan thuchhuah siamin, "Sinisa Mihajlovic chu a hna aṭangin chawlhtir a ni a, club tana a hnathawh leh a theihna a lo hlan tawhte avangin lawmthu kan sawi," an ti.

Coach thar kum 40-a upa Brocchi hi tun hnai kum thum chhunga Milan coach pangana tur a ni ang.