Football superpower nih tum China

Thlasik transfer-a Chinese Super League-in world class player an lak luh nual hnuah Chinese Football Association chuan kum 2050-ah chuan football superpower nih an tum thu puangin an ruahmanna an tlangzarh.

China president Xi Jinping hi football ngaina tak a ni a, kum 15 chhung ngeia China chu FIFA World Cup nomawi chawi tura a duh thu a sawi. Olympics leh Paralympics lamah China hi ropui viau ṭhin mah se World Cup-ah erawh kum 2002 chiah khan an la khel a, FIFA ranking-ah 81-na an ni mek.

CFA ruahmanna ang chuan kum 2020-ah chuan football training centre 20,000 tal neih leh khelmual 70,000 tal neih a ni a, kum 2030-ah chuan mipui 10,000 zel tan khelmual ṭha neih an tum.

Kum 2030-ah chuan China football team chu Asia khawmualpuia ṭha ber zinga mi an ni tur a ni a, an hmeichhe team chu kum 2030-ah chuan world class team an ni tur a ni tih a ni bawk.