Chelsea fan tan John Terry

Season thara Chelsea chhuahsan tur anga an sawi captain John Terry chuan Chelsea fan kum riat mi leukaemia natna avanga thi ta Tommi vuina senso atan £1,600 a thawh.

Tommi nu Ruth Miller chuan John Terry-a chungah an lawm takzet thu a sawi a, England captain hluiin an fapa a lo la hre ve reng chu an lawm takzet thu a sawi bawk.

Ruth Miller chuan, "Stamford Bridge kan tlawh ṭum pawhin Terry hian kan fapa kha a ngainain a khawngaih em em a, mahse hetianga a lo hriat ve reng hi kan beisei ngam lo. Kan fapa khan Terry hi a player duh leh ngaihsan em em a ni a, a hmalakna avang hian kan lawm takzet a ni," a ti.

John Terry pawhin kum thum mi lek a nih laia leukaemia natna veitu Tommi chungchang sawiin, "A dam lai ngeia kan inhmu hman kha ka lawm em em a, a thihna hian min ṭhawng na takzet a ni. A chhungte pawn a phu ang ngeia ropui taka an thlah liam ka beisei," tiin Tommi a thlah.

Tommi vuina hun hi naktuk khian neih a ni dawn a, he huna kalte chuan Chelsea jersey emaw Tommi-a pian leh seilenna club Cambridge United jersey an ha dawn a ni.