Leicester ticket a zo rang, fans an lungawi lo

Season hmasaa relegation battle sualtu Leicester City-in season tharah Champions League an khel dawn chiang a, Premier League champion tura dinhmun ṭha taka an din bawk avangin tun season-a an home match hnuhnung ber Everton nena an khelh tur ticket chu minute 90 chhungin an hralh zo vek!

Thawhṭanni zing khan Leicester hian an ticket hi an zuar chhuak a, mipui 32,262 lenna King Power Stadium-a an home match hnuhnung ber en tura ticket chan tumin zing dar 6:00-ah chuan stadium kawtah mipui an pungkhawm vek tawh.

Leicester hian Premier League-ah match nga chiah khelh tur nei tawhin champion turin match thuma an chak a tawk. Foxes hian April 17 leh 24-ah West Ham leh Swansea City an mikhual ang a, May 1-ah Manchester United lenchilhin an home match hnuhnung ber hi May 7-ah Everton nen an khel ang. Tun season-a an match hnuhnung ber chu May 5 khian Chelsea khelmualah an khel dawn bawk a ni.

Ticket man a to

Leicester City leh Everton inkhel tura ticket man hi a pangngaiah chuan puitling tan £30-£50 (Rs 2850 - Rs 4750) a ni a, Leicester fan ruhkawl tana thu lawmawm loh chu ticket chang lo tam tak an awm laiin Everton nen an inkhelh tura ticket hi hralh zawh a nih aṭanga darkar khat chhungin ticket zuar chhawng ṭhin tam takin man to uchuak takin an zuar chhawng nghal.

Foxes home match hnu-hnung ber ticket man hi web-site ṭhenkhatah £3,000-a (Rs 2,84,966) zawrh chhawn a nih laiin mi pahnih tana £15,000 (Rs 14,24,835) laia zuar an awm bawk. Leicester lam pawhin thuchhuah siam nghalin ticket zawrh chhawn chu danin a phal loh a nih thu an sawi a, ticket lo zuar chhawng luite chu na taka hrem tura hmalak tum a nih thu an puang.

Mayor meuh pawh

Leicester khawpui Mayor leh Foxes fans ruhkawl ni bawk Sir Peter Soulsby chuan, "Zing dar 7:40-a stadium ka thlen chuan King Power Stadium pawnah ticket chan tum player-te chu an lo intlar khat vek tawh a, ticket ka lei zawh hnua ka haw pawh khan ticket chan hram inbeiseiin fans tam tak an lo la pungkhawm a ni," a ti.

Leicester South area aṭanga Member of Parliament (MP) pawh lo ni tawh Sir Peter chuan sawi chhunzawmin, "Pa pakhat ka tawh chuan zanah Barbados lamah a nupui nen an kal tur thu a sawi a, ticket chan ngei a duh bawk si avangin a nupui nen an inhmuhthiam loh hial thu min hrilh a ni," tiin Everton leh Foxes inkhel tur ticket chuan ngaihven a hlawh takzet thu a sawi.

Fans thukhawchang

BBC Sport nena inkawm fan pakhat chuan, "Everton nen kan inkhel tur hi ngaihhlut loh theih loh a ni. Tun season-a kan hun hman dan hi kan beisei phak loh leh suangtuah ngam loh a ni a, kan damchhung hian a thleng nawn tawh kher lo mai thei. Chuvangin Foxes fan tan chuan Everton nena kan inkhel tur hi hmaih tur atan chuan a uiawm lutuk a ni," a ti.

A hming tarlan duh loh fan chuan sawi chhunzawmin, "Kan club hi fan-te nen an thawkho
ṭha ṭhin em em a, mah se tun
ṭum zet chu an chesual ve a ni. Ticket hralhchhuah a nih dan chungchangah fans tam takin zawhna tam tak an nei. Leicester fan pangngaiin engtinnge mi pahnih tan £15,000 man ticket a lei ngam ang? second-hand car man nen a inzat reng a ni," tiin fans tam takin ticket an chan loh laia ticket zuar chhawng
ṭhin hoin an nei hman chu club ruahmanna fel loh vang nia a ngaih thu a sawi.

Fans lawm lohna

Football club tinin fan ruhkawl zual tan member club an nei ṭhin a, an club member-te hi an sum thawh dan a zirin category hrang hrangah ṭhen leh ṭhin a ni.

Leicester fan zingah Family Fox member-te chu dinhmun sang ber an ni a, Gold Fox member-in zuiin Silver Fox leh City Fox member-te chu a hnuaiah an awm ve leh.

Club kalphungah chuan sum chawia membership ti te hi ticket hralh chhuah leh kawng hrang hrangah duhsak hlawh bik tur an ni a, mah se Everton nena an inkhel tur ticket-ah erawh club member-te duhsak an ni lo a, fans tam takin hei hi an ngai haw hle.

Eng nge an sawi?

Leicester member zinga ticket chang lo David Lea chuan, "Ticket an hralh zo a, a hnu lawkah site ṭhenkhatah £495 - £5,000 in zawrh chhuah leh a ni a, gold/silver member nih hi eng nge a ṭangkaina?" tiin club a zawt.

Gold membership neitu Ben Dunkley chuan, "Kan ticket hralh chhuah hi fiamthu ang chauh a ni. Gold membership nei turin £75 kan seng a, awmze nei lo mai a ni," tiin a lungawi lo hle.

Peter Schoneveld chuan, "Family membership nei chunga ticket ka chan theih loh avangin zing dar 9:00 aṭangin vawi 85 lai kan club ka call tawh a, engmah awmzia awm lo. Hetiang huna duhsak kan hlawh theih nan £100-in membership kan ti a, mah se kan beisei ang engmah kan hmu lo a, ka thinrim takzet a ni," tiin an club chunga a lungawi loh thu a sawi.

Kum 1968 aṭanga Foxes member lo ni tawh Adie Wheat chuan, "Kum 1968 aṭang khan Leicester inkhel hi chu ka la en vek zel. Silver member ka ni a, mah se league nomawi chawi theihna hun ṭha kan neihah stadium-ah ka awm ve dawn lo," tiin a lunghnur hle.