Zaninah Palace vs Everton

Crystal Palace leh Everton ten FA Cup semifinal thleng mah se Premier League lamah erawh hmun himah an la awm lo. Zanin dar 12:30 hian Selhurst Park-ah an intawng dawn a, point thum zawk hi chu him chiang tura ngaih an ni ang.

Nimin tlai press conference-ah Roberto Martinez chu Romelu Lukaku, Ross Barkley leh Gerard Deulofeu te nei chunga 14-na daiha an awm chhan an zawt a, Everton boss chuan, "Chhan harsa a ni lo. Goodison Park-ah result kan nei ṭha ṭhin lo, khualmuala kan chetṭhat pawhin kan mualah kan chhunzawm thei lo a, kan phu tawk ang point kan hmu lo bawk," tiin a chhang.

Result chhiat vangin Toffees boss hi supporter-te chuan bang turin an nawr a, Martinez chuan, "Mipui thinrimna hi ka hrethiam a, club kan hmangaih vek avangin a ṭhat dan ber hi kan duh a ni. A tawpah chuan a pawimawh ber chu season tawpa kan dinhmun a ni," tiin dinhmun ṭha zawk an la din theih thu a sawi.

Crystal Palace hian Alan Pardew hnuaiah season bul ṭan chhe lo mah se kum 2016-ah result ṭha hlawhchhuah an harsat a, kumin chhunga an chak hmasa ber chu kartawpa Norwich City 1-0 a an hneh ṭum kha a ni.