Roma leh Bologna inhnehtawk

AS Roma chuan Serie A nomawi beisei ngam chiah tawh lo mah se season thara Champions League khelh ngei an tum. Mahse Thawhṭanni zan khan Bologna nen 1-1 a an inhnehtawk avangin an din-hmun a la him bik lo.

Bologna khelmual Stadio Olim-pico-ah Roma tan Mohamed Salah vanneih ni a ni lo a, goal ban vawi thum ngawt a pet per. Minute 25-naah defender Luca Rossettini-a'n hmahruaina goal a khung a, Salah chuan second half-ah a sut hram.

January thla hnua a vawi khat nan Roma legend Francesco Totti chu khelmual chhungah a inlan a, Salah goal khung tur siamsak mah se point thum a hlawhchhuah pui thei bik lo.

Kum 39-a upa Totti hian season 23 chhung Roma tan a khel tawh a, match 593 khel tawhin goal 244 a khung tawh.

'King of Rome' tia hming lem an vuah sak Totti chungchang sawiin Roma coach Luciano Spalletti chua,"Totti hi inkhel turin a inpeih a, kan mamawh anga a khel chhuak thei a nih chuan zanin ang khan khelmual chhungah a hmel kan hmu zel ang," tiin a sawi.

Roma hian league match 32 an khelh tawh aṭangin point 64 an hmu tawh a, Serie A table-ah pathumna dinhmun luahin an hnuai chiaha awm Inter Milan aiin point rukin an sang rih a, hmahruaitu Juventus erawh point 12 zetin an thlau tawh thung.