Saina inhnukdawk

Indian shuttler Saina Nehwal chu tunkar chhunga khelh tur Mala--ysian Open-a inlan tura tih ni tawh mah se a in-hnukdawk leh hnu-hnawh.

World number 8 Saina hian beisei angin kum a hmang ṭha lo a, kum tirah world number 2 ni mah se tunah chuan a dinhmun a tlahniam rih hle. Saina a inlan dawn loh takah chuan Kidambi Srikanth leh PV Sindhu te chu Indian badminton beiseina an ni ang.

Saina-i pa Harvir Singh Nehwal chuan a fanu in chawlh a duh thu sawiin, "A hriselna dinhmun a ṭha a, harsatna a nei lo. Mahse ṭha taka khel thei tur chuan inbuatsaihna
ṭha a neih a ngaih bakah a taksa a chawlh hahdam ve a ngai a, chu vangin Malaysia a inlan loh hi a thlang rih a ni," tiin a sawi.

April 26 aṭanga May 1 chhung khian Badminton Asia Championship chu Wuhan, China-ah khelh a ni dawn a, he hunah hian Saina hi inlan thei ngei tura ngaih a ni thung.