Gujarat Lions hmaah Punjab an tlawm

Thawhṭanni zan Indian Premier League inkhelah Gujarat Lions chuan mikhual ze ṭha chhuah duh loin mualneitu Kings XI Punjab chu wicket rukin an hneh.

Punjab Cricket Association Stadium, Mohali-a inkhelah mualneitu Kings XI-in over 20 chhungin run 161 an siam a, mi paruk an hloh. Mualneitu team tan Murali Vijay chuan run 42 siamin a siam hnem ber a, run 38 siamtu Manan Vohra chuan a siam ṭha thawkhat viau bawk.

Mikhual team tan bowling lamah Dwayne Bravo a che ṭha fal a, West Indies all rounder hian over li a vawmah run 22 chiah pein wicket li a la thei a ni.

Gujarat Lions-in over 17.4-ah an target an umpha der a, run 162 siamin mi panga chiah an hloh. Mikhual team batsman zingah Aaron Finch a che ṭha fal a, Australian batsman hian run 74 zet a vaw chhuak.

Finch-a opener pui Brendon McCullum chu run siam loin out mah se Aaron Finch pui turin Dinesh Karthik a khel ṭha a, wicketkeeper-batsman hian run 41 siamin a tawp thleng a dam ve bawk a ni.

Nizan khan Royal Challengers Bangalore leh Sunrisers Hyderabad inkhelin an result erawh kan hre hman lo. Zanin dar 08:00 hian Kolkata Knight Riders leh Mumbai Indians an inkhel bawk ang.